WILLEMSTAD - COPPPAL lo yuda Kòrsou den su proseso di kambio estatal. E organisashon COPPPAL ku ta agrupá un kantidat di partido polítiko di un kantidat di pais den Latinoamerika i di Karibe, a aseptá dos resolushon den kua ta pidi atenshon di Nashonnan Uní pa e proseso di dekolonisashon di Kòrsou.
“Un logro sumamente importante”, asina dirigentenan di tantu MAN, Charles Cooper, di Pueblo Soberano Helmin Wiels i tambe di PLKP Errol Cova a koinsidí.
Aliansa Patriótiko, desgustá i desapuntá ku e no ta hañando oido serka gobièrnu pa su preokupashon pa e rumbo ku e trayekto estatal di Kòrsou ta bayendo, a disidí ku e lo partisipá na e enkuentro di COPPPAL ku a tuma lugá siman pasá na Panamá.
“No a keda nos niun otro rekurso, sino di buska sosten internashonal pa e lucha ku nos ta hibando”, asina Charles Cooper a deklará promé ku salida di e delegashon pa Panamá.
Ayera, e partidonan a duna un rekuento na prensa di nan biahe pa Panamá kaminda e enkuentro di COPPPAL a tuma lugá. Banda di e dos resolushonnan aki, tin tambe un karta ku presidente di COPPPAL mes lo manda pa Nashonnan Uní, den kua e ta uni su mes ku e lucha di Kòrsou.
“Den e deklarashon final ku a aseptá na final di e enkuentro di COPPPAL ta fiha e parti di Kòrsou bon kla”, segun Cova.
“E sosten pa Kòrsou ta unánime: henter kontinente ta para nos tras”, Charles Cooper a bisa. Den e deklarashon aki, na punto 10 ta bisa ku lo instituí un komishon, den kua tin un representante di Aliansa Patriótiko, di Partido Liberal di Honduras, di Partido Independentista di Pto. Rico i PLD di Repúblika Dominicana ku ta bai sigui ku e lucha aki.
“Mi ta sintimi orguyoso di ta yu di Kòrsou”, asina Helmin Wiels di Pueblo Soberano a ekspresá.
“E espíritu di resolushon 25 i 28 di Nashonnan Uní ta bisa bon kla ku tur pais na mundu tin e derechi sagrado di ehersé nan derechi di outodeterminashon. Ku otro palabra, nan ta liber pa skohe e status ku nan ta deseá. Ningun pais tin mag di opstakulisá otro den su lucha pa ehersé su derechi di outodeterminashon”, di akuerdo ku Wiels.
E dirigentenan polítiko di Kòrsou a bisa, ku nan ta satisfecho ku e bishita ku nan a realisá na Panamá i ku ta awor e lucha ta bai kuminsá di bèrdè.
E intenshon ta pa presidente di COPPPAL Thomas Borge bishitá Kòrsou den transkurso di ougùstùs benidero.