WILLEMSTAD - Minister di Enseñansa i Kultura sra. Omayra Leeflang a tene e diskurso di apertura den oula di Universidat di Antia, ayera mainta na e promé “gastcollege”, organisá pa Plataforma di Awa di Antia di Aruba.
Rector Magnificus di UNA sra. Jeanne de Bruijn i Anthon Casperson di Aqualectra tambe a yama e partisipantenan bonbiní na gastcollege.
Den e siman aki di 21 pa di 24 aprel lo tin un “gastcollege” na UNA ku ta un aktividat di e CWTRI, ku ta un proyekto di e plataforma di Awa di Antia i Aruba.
Dr. Ir. Jasper Q. J. C. Verberk di Hulanda i Ir. Filomeno A. (Boey) Marchena di WEB Aruba lo duna un kantidat di “gastcolleges” den e siman aki ku e tema “Drinkwater Principe en Praktijk”.
E “colleges” lo trata produkshon di awa di bebe i tratamentu di e awa di bebe. Sr. Verberk lo tuma pa su kuenta e parti di awa bou i riba tera durante 3 dia i sr. Marchena e parti di desalinashon di awa di laman pa produsí awa dushi. E último aki ta konsistí di produkshon di awa na W.E.B. Aruba N.V., e aspektonan teorétiko i práktiko di e teknologia térmiko di evaporashon i e proseso pa tuma desishon i konstrukshon di e planta di awa di SWRO.
Banda e collegenan aki lo tin ekskurshonnan na e planta di Awa na Fuik, Tanki di awa, SCADA di Aqualectra i Klein Kwartier.
Na 2005 e kompanianan di awa AQUALECTRA di Curaçao, W.E.B. Aruba N.V., WEB Bonaire N.V. i G.E.B.E. N.V. di St. Maarten a lanta e Plataforma di Awa Antia i Aruba abreviá WNAA.
Meta di e plataforma ta pa reforsá e lasonan i koperashon entre e kompanianan. E WNAA ta dirigí pa un grupo piloto ku ta konsistí di e direktornan di e kompanianan di awa. E plataforma ta konsistí tambe di un kantidat di grupo di trabou bou kual tin: Seguridat, Kalidat di Awa, Distribushon di Awa, Training, Komunikashon i Teknologia di produkshon di Awa.
Den kuadro di e importansia mas i mas kresiente di e disponibilidat di sufisiente awa di bebe puru nan Mundu, e WNAA a disidí pa krea un “Caribbean Water Technology Research Institute”, CWTRI. E meta ta, mirando e eksperiensha di mas ku ochenta aña ku ta desaliná awa di laman pa produsí awa di bebe na Antia, ta hasi di e CWTRI un sentro di konosementu di altá kalidat pa e área di Karibe i sobra di mundu. Den e sentro aki lo hasi investigashon na nivel akadémiko riba e tereno di produkshon, distribushon i kalidat di awa di bebe.
Dia 14 di novèmber 2007 den kuadro di e CWTRI, a firma un akuerdo di koperashon na Delft ku e “Technische Universiteit van Delft” (TU Delft), e “Vereniging van de Waterbedrijven in Nederland” –VEWIN i e Universidat di Antia (UNA).
Na yanüari 2008 na Sürnam e mesun akuerdo di koperashon aki a keda firma ku “N.V. Surinaamsche Waterleiding Maatschappij” (SWM). Ta e intenshon pa den futuro serkano e Universidat “Anton de Kom” di Paramaribo tambe partisipá den e akuerdo aki.
Pa ehekutá e akuerdo aki tin aktualmente tres kordinadó esta ir. Filomeno A. Marchena pa e WNAA, Dr. ir. Jasper. Q.J.C. Verberk pa TU Delft i Mr. Ir. Richenel E. Bulbaai, MBA pa UNA. Dor di e koperashon aki e konosementu di e TU Delft riba tereno di produkshon di awa di bebe, transporte i distribushon den su totalidat ta disponibel pa UNA, CWTRI i SWM. Pero tambe e konosementu partikular i eksperiensha riba tereno di desalinashon di awa di laman di e kompanianan di Sürnam, Aruba i Antia ta keda kompartí ku TU Delft.
For di 7 di aprel último tambe tin otro proyekto piloto ta tumando lugá, ku ta e promé investigashon di e CWTRI, kual ta: “Drinken van de Wind” .
Tres studiante den nan fase final di studio na TU Delft ta hasi nan investigashon di práktika riba e tereno di AQUALECTRA na e planta di awa na Fuik. Studiantenan di UNA tambe ta enbolbí den e proyekto aki.
E proyekto aki ta enserá e produkshon di awa di bebe dor di desaliná awa di laman ku un instalashon di SWRO (Seawater Reverse Osmosis) pero ku ta traha pa medio di un mulina di bientu. E mulina mekanikamente ta drai un pòmp di preshon haltu e instalashon di SWRO. Un sistema ku no ta generá elektrisidat promé, pa e drai e pòmp. E investigashon di práktika ta dura te ku sèptèmber 2008. Den transkurso di aña lo sigui duna informashon riba e investigashon.
Plataforma di Awa i Antia ta deseá tur partisipante na e “gastcollege” na UNA un siman fruktífero.