WILLEMSTAD – E problema di abeha ta hañando atenshon, ounke no tin nada konkreto ainda ta tumando lugá. Awor ku a konkluí ku ta L.V.V. ta responsabel pa un maneho, pa atendé ku e molèster kousá pa e bestianan akí, tantu e diputado enkargá ku salubridat públiko komo e diputado enkargá ku L.V.V. mester formalisá un maneho.
Loke tin aktualmente ta un proposishon di parti di G.G.D. E proposishon akí a konkretisá despues ku gobièrnu a pidi for di yanüari un ‘update’ riba e ‘bijen werkgroep’. G.G.D. a sòru pa e update akí kaminda a konkluí ku e problema di abeha ta regardá LVV. Den e update ku gobièrnu a risibí, G.G.D. i L.V.V. a asumí un posishon. Komo ku L.V.V. mes no tin sufisiente hende pa trèk e proyekto, a proponé pa usa un eksperto di G.G.D. pa yuda L.V.V.
Na e momentunan akí e diputadonan Humphrey Davelaar i Anthony Godett tin ku tuma e pasonan nesesario pa L.V.V. i G.G.D. por kuminsá inventarisá e problema i e posibel solushonnan.