WILLEMSTAD – Un revista finansiero na Polonia, ‘Warsaw Business Journal’, a saka un relato resientemente riba e paisnan ku mas ta invertí den Polonia.
E análisis a keda hasí pa Banko Sentral di e pais ei i ta indiká, ku e fuente direkto di invershon na Polonia ta kambiando.
“E fuente direkto di invershon (FDI) na Polonia a kambia,” asina e presidente di National Bank di Polonia a bisa. “E ganashi ku ta keda reinvertí pa empresanan internashonal aktivo kaba na Polonia ta komprometé e tipo di invershon mas grandi di FDI na Polonia,” el a añadí.
E tipo di reinvershon aki ta 41.5% di e 12.8 bion euro di FDI ku Polonia a apsorbá aña pasá. Esaki ta un suma total di 5.33 bion euro ku ta un oumento di 22.3% den invershon kompará ku na 2006.
Kasi 85.3% di e tur FDI a bini di kompanianan ku tin base den Union Europeo, Fransia ku e gran mayoria ku 17.7%.
Lokual ta remarkabel ta, ku kompanianan establesé na Antia, ta esnan ku hasi mas invershon ku kualke otro pais pafó di Union Europeo na Polonia ku eksepshon di Merka. Tras di Antia a sigui Sur Korea i Hapon.
Ku tur probabilidat aki ta trata di kompanianan di Off-Shore ku ta establesé aki na Kòrsou ku a hasi e invershonnan kuantioso na Polonia pa sali asina haltu riba e lista aki ku a keda publiká pa e Banko Sentral di Polonia.