PENNSYLVANIA, Merka, - Hillary Clinton ayera a vense su rival Barack Obama den e elekshonnan primario na Pennsylvania, ku esaki el a prolongá e karera presidensial demókrata, ku a bira kada bia mas negativo, i ta manteniendo bibu e tiki speransanan di yega Kas Blanku.
Clinton a optené 55% di votonan frente 45% di Obama, un resultado sólido pero kisas no sufisiente pa kòrta bentaha di Obama den kantidat di delegado, kendenan ta eligí e kandidato di e partido den konvenshon di ougùstùs.
Sin embargo, e dama senador di New York a sobrebibí un fuerte kampaña publisitario di Obama, kende a gasta mas ku dòbel kuné den e elekshonnan primario demókrata den seis siman, i lo por sirbié pa optené dividendonan den kampaña di rekoudashon di fondonan.
Pa Obama, e viktoria di Clinton no tabata sorpresa. P’esei no ta un koinsidensia ku el a disidí bai Indiana ayera, kaminda ta bai realisá e siguiente etapa di e elekshonnan primario.
“Algun persona ta konsiderá mi pafó, i nan a bisa mi pa mi sali for di e karera, pero e pueblo merikano no ta entregá i nan meresé un Presidente kende tampoko ta entregá!”, Clinton a bisa su partidarionan na Philadelphia.
Meimei di gritunan i aplousonan, e dama senador a konsentrá su mensahe pa deliniá plannan ku e tin pa e pais, si e yega Kas Blanku i kontrali loke a pasa den dianan promé ku e elekshonnan primario, na niun momentu e no a kritiká su rival Barack Obama.
Obama, di su banda, a felisitá su kontrinkante, pero el a probechá den su diskurso pa kritiká George W. Bush fuertemente i indirektamente famia Clinton.
“Nos ta aki pasobra nos no por sigui ku loke nos ta hasiendo den último 4 aña. Nos no por riska nos mes pa sigui hunga e mesun weganan na Washington, ku e mesun hungadónan i spera un resultado diferente. E bia aki no! Awor aki no!”, Obama a bisa dilanti un multitut entusiasmá.
Clinton, di kende su kampaña tin debenan i ta kedando sin sèn, a urgí su partidarionan pa bishitá su “site” riba Internet i realisá donashon.
“Futuro di e kampaña aki ta den boso man!”, e dama senador a sigurá, kende riba esenario tabata kompañá pa su esposo, eks Presidente merikano Bill Clinton, i pa su yu muhé Chelsea.
E votashon na Pennsylvania, ku ta repartí 158 delegado, a duna inisio n’e fase final di e lucha disputá pa kandidatura demókrata.
Ta keda nuebe mas te dia 3 di yüni.
Niun di e dos kandidatonan no ta entregá. Asina ta, ku e lucha ta sigui te Konvenshon Nashonal di Partido Demókrata na kabamentu di ougùstùs.
Esaki ta spanta dirigentenan di e partido pa e tono ku e kampaña a tuma i mayoria hende ta kere ku esaki solamente por perhudiká nan na plaso largu.
E republikanonan tambe ta opiná ku e pelea entre Clinton i Obama ta benefisiando nan kandidato John McCain, kende ta spar tur su forsa i tur su sèn pa e bataya final di 4 di novèmber.
E karera ta pasa awor pa dia 6 di mei na Nort Carolina, kaminda Obama ta faborito; i Indiana, kaminda Clinton tin un bentaha leve.
Obama ya ta preparando pa loke ta bini i el a bandoná e estado pa asistí na un enkuentro polítiko na Evansville, Indiana.
Esaki ta e di kuater oportunidat ku Clinton ta gana elekshonnan primario durante kua su kandidatura tabata den wega, ounke Obama a redusí e bentaha di 20 punto den e sondeonan.
“Tabatin hopi hende ku no a kere ku nos por yega asina leu, ora e karera a kuminsá”, Obama a bisa na Evansville.
“Seis siman despues, nos a sera e distansia. Nos a reuní hendenan di tur edat i rasa den nos kousa”, Obama a señalá.
“I si nan a keda inspirá pa promé bia òf pa promé den hopi tempu, nos ta registrá un kantidat rèkòrt di votante ku lo hiba nos partido na viktoria na novèmber”, e senador di Illinois a añadí.
Nan ta mantené nan apoyonan
Despues di viktorianan di Clinton na Ohio, California, New Jersey i Texas, e resultado a uni na su afirmashon ku e ta é demókrata ku por gana estadonan grandi, kaminda e partido mester triunfá den e elekshonnan presidensial di novèmber.
E resultadonan a mustra ku ámbos kandidato ta mantené nan base di votante.
Obama, kende lo por bira e promé Presidente afroamerikano di Merka, a optené nuebe di kada voto di persona pretu i a logra e bentaha entre hóbennan i hòmbernan.
Clinton, kende lo por bira e promé dama Presidente di Merka, tabata faborito di adultonan mayó di 65 aña, di trahadónan, hòmbernan blanku, i tambe mas ku mitar hende muhé.
E dama senador tambe a optené 58% di voto di esnan ku a eligí su kandidato den último siman, ora Obama tabata na defensiva pa un seri di polémika den un debate di siman pasá.
Obama tin bentaha riba Clinton den kantidat di voto popular optené durante promé tres luna di e elekshonnan primario i den e delegadonan pa eligí e nominado den konvenshon na ougùstùs.
Pero niun di nan dos lo por optené e kandidatura sin apoyo di e “superdelegadonan”, mas o ménos 800 miembro di e partido kendenan ta liber pa apoyá kualke aspirante.

Foto: Hillary Clinton 2304

Hillary Clinton selebrando su viktoria na su “primary election night party” na Philadelphia, huntu ku Gobernador di Pennsylvania, Ed Rendell.

Foto; Bill Clinton Hillary 2304

Hillary Clinton ta papia durante su diskurso na Philadephia ayera, miéntras su esposo eks Presidente merikano Bill Clinton ta bati man p’e.

Foto: Hillary Clinton 1 2304

Hillary Clinton ta selebrá huntu ku su simpatisantenan ayera nochi.

Foto; Hillary Clinton 2 2304

Hillary Clinton ta zuai man pa su siguidónan djis despues ku el a gana ayera nochi.

Foto; Barack Obama 2304

Barack Obama ta felisitá su kontrinkante Hillary Clinton.

Foto; Barack Obama 1 2304

Barack Obama ta papia durante su kampaña na Evansville ayera nochi.

Foto: Barack Obama multitut 2304

Barack Obama ta saludá su simpatisantenan despues di su kampaña na Evansville ayera nochi.