YAKARTA – E relevo di e antorcha olímpiko na Indonesia a keda efektuá ayera kasi ku porta será, esaki riba petishon di China, outoridatnan lokal a limitá e kantidat di persona ku invitashon spesial pa drenta den e stadion unda e vlam a wòrdu traspasá.
Polis a detené vários manifestante ku a forma un multitut pafó di e stadion ku bandera i pankartanan pro Tibet.
Ta trata aki di e kontratempu mas resien di e relevo mundial ku a inisiá na Beijing i kual China a kere ku lo a bai promové nan positivamente.
Vários di e paisnan den Asia mester a kambia e ruta i pone muchu mas seguridat. Na Indonesia un kantidat di 3 mil polis a wòrdu poné riba pia pa e evento aki den e kapital di e pais. Ainda ta spekulá ku lo bai tin hopi protesta na Oustralia i Sur Korea, e próksimo dos paradanan di e relevo.
E akto na Yakarta ni a wòrdu transmití bibu na televishon, ya ku ningun kanal no kier a paga pa e derechinan.
Mayoria di e 5 mil invitadonan tabata funshonarionan di gobièrnu, chinesnan bibá na Indonesia, studiante i spònsernan.
Na Indonesia no tin masha interes pa Weganan Olímpiko, nan tabata e úniko pais na mundu na 2004 ku no a pasa e weganan na televishon.
Algun ora promé ku e yegada di e antorcha, vários persona tabata protestá i a wòrdu detené brevemente pa polis, entre nan un ulandes.