WILLEMSTAD - Diputado di Infrastruktura Anthony Godett a disidí ku e ta kanselá e reunion ku e tabatin ku e invershonista Eduardo de Veer di META Corporation. E motibu, ta deklarashonnan ku De Veer lo a hasi na Aruba ku a kai den masha mal tempu serka e mandatario.
Ta parse ku e tenshon ku pa basta dia kaba ta reina pa motibu di e desaroyonan na Rif, a rementá ayera.
Tantu Meta Corporation komo un grupo ku ta yama su mes Grupo Cayco, ke haña e tereno na Rif pa desaroyá un proyekto turístiko mionario.
E problema ku a bin ta manifestá sinembargo ta, ku den seno di Bestuurscollege tin pensamentu diferente ken lo mester haña e derechi pa desaroyá e área.
Reportadamente partidonan PAR i PNP lo ta na fabor di e grupo Meta Corporation ku ta konstruyendo kaba Hotel Renaissance den e mesun área aki, miéntras ku Frente Obrero a ekspresá sosten pa grupo Cayco, un grupo venezolano ku tambe aparentemente ta finansieramente hopi fuerte i ku ta kla pa kuminsá mesora, manera nan mes a indiká.
“Mi pensamentu ta bon kla. Grupo Cayco ta fuerte, e ta konfiabel i e ta karga mi aprobashon. Tur konseho te ainda ku mi a haña di e grupo aki di mi servisio i konseheronan ta positivo. Mi no tin niun motibu pa duda den e posishon ku mi a tuma,” asina Anthony Godett a bisa.
El a bisa, ku ta sorpresa, pero alabes ku desgustu el a tuma nota kon ayera Eduardo de Veer di Meta Corporation a saka informashon robes na Aruba.
“De Veer ke hasi komo si fuera gobièrnu no tin nada di bisa. Den un pais, ta gobièrnu ta dirigí i disidí. Mi ke anunsiá for di awor, ku mi ta kanselá e reunion ku mi tabatin pendiente ku Eduardo de Veer pa e siman aki. Si esei tin konsekuensia pa gobernashon, anto lag’é ta asina,” Anthony Godett a sostené.
E diputado a ripití su ponensianan anterior, den sentido ku “De Veer a haña tur tipo di regalo i ta kere ku e por hasi i deshasí.”
Godett a bisa ku De Veer ta trahando un hotèl, anto awor ta parse ku sèn a kaba. Ta p’esei e ke bende e hotèl ku un grupo venezolano den kua nan ta oblig’é di partisipá ku 25 porshento. Ademas, De Veer ta kana rònt ku un plan ku el a haña ilegal for di un servisio di gobièrnu, e diputado a ripití.
Ami ta tratando di solushoná e diferensha di opinion ku surgi anto di ripiente e invershonista ta saka informashon ku no ta kuadra ku bèrdat.
“Si un invershonista ta kere ku paso e tin sèn, e por hasi i deshasí, e ta gravemente kibuká. Serka mi, e fli ei no ta subi,” tabata palabranan di Anthony Godett.