WILLEMSTAD - E proseso pa balorá propiedat i alabes determiná debe ku Antia tin, no ta finalisá ainda. Loke tin riba mesa ta un rapòrt provishonal. Di akuerdo ku e sifranan provishonal aki, balor di tur propiedat di Antia ta mustra un suma negativo di 1.3 mil mion florin. Pero ainda falta diferente komponente pa keda balorá, manera entre otro ophetonan di arte. O sea, ku tur kos den dje por kambia ainda, asina a sali na kla ayera tardi, durante un reunion di Komishon Sentral di Staten.
Na e okashon aki, parlamentu a haña un presentashon di Komishon Repartishon di Bienes di Antia.
E komishon a haña tres tarea: na promé lugá, inventarisá tur propiedat di Antia, na di dos lugá balorá e propiedatnan aki i na di tres lugá presentá gobièrnu un proposishon kon por repartí e propiedatnan aki entre e islanan di Antia.
Presidente di e komishon aki Alberto “Chos” Romero a splika ku a usa e ehèmpel di Aruba komo punto di salida, kombiná ku e balans di propiedat di gobièrnu di 2005.
Ta bon pa bisa mesora, ku a usa 2005 komo punto di salida pa determiná tantu propiedat komo debe. A base di esei, a yega na e konklushon temporal ku propiedat di Gobièrnu Sentral awor aki ta 1.4 mil mion florin, miéntras ku e debe ta 2.8 mil mion florin.
Romero a mustra den mesun rosea sinembargo, ku tin algun entidat ku ainda no a kaba di balorá. Ta trata aki di Banko di Seguro Sosial (SVB), Fondo di Penshun di Antia (APNA) i tambe Banko Sentral di Antia (BNA). Ku otro palabra, ainda mester konta balor di e tres entidatnan aki aserka.
Komo punto di sali pa repartishon di bienes, segun Romero, a usa dos aspekto ku ta produkshon nashonal (BBP) i tambe grandura di poblashon di e islanan.
A base di esaki, por konkluí ku den repartishon di propiedat, Kòrsou lo risibí 73.3 porshento, St. Maarten lo haña 18.8 porshento, Boneiru lo risibí 5.8, miéntras ku e islanan Statia i Saba lo risibí respektivamente 1.5 i 0.7 porshento.
Ta bon pa bisa mesora, ku tantu Kòrsou komo St. Maarten a pidi pa tene kuenta ku traspaso di algun entidat. Den kaso di Kòrsou, a pidi pa tantu UTS komo Woningbouw keda apart, miéntras ku den kaso di St. Maarten esaki ta e planta di produkshon di awa i koriente GEBE.
Ademas a sali for di e punto ku e isla ku tuma un propiedat, ta tuma alabes e debe ku e propiedat ei ta karga.
Komishon Repartishon di Bienes di Antia ta proponé ademas, ku ora yega e momentu berdadero di desmantelashon di Antia, pa bolbe balorá e propiedatnan. Manera indiká kaba, awor aki ta mantené 31 di desèmber 2005 komo punto di salida.
“Tempu ku Aruba kier a sali for di Antia, Aruba a tuma 15 aña i mester a traha no ménos ku 10 balans di propiedat, promé ku e repartishon definitivo entre Antia i Aruba tabata kla. Nos en todo kaso ta spera di hasi esei ku ménos trabou i den ménos tempu,” tabata e remarke adishonal di Alberto Romero.