WILLEMSTAD - E menasa di Sindikato di Transporte Uní ku si pa djaweps e no haña un kontesta di gobièrnu riba e karta ku el a entregá ayera, ta for di mesa. Esaki, despues ku STU a sinta na mesa ayera tardi ku diputado responsabel pa transporte Anthony Godett.
“Falta di informashon”, asina e mandatario a splika e kambio sorprendente di shofùrnan di bus.
E shofùrnan ayera a tene un akshon morkoi durante kua nan a bai entregá un karta na gezaghèber Magali Jacoba. Den e karta, nan ta bisa ku na dos okashon kaba nan a buska un apertura serka Bestuurscollege, pero sin resultado.
Si pa djaweps awor nos no tende nada, nos lo tuma desishon kiko nos ta hasi, ta loke bosero Andres Everitz a deklará.
Manera LA PRENSA a informá for di ayera kaba, gezaghèber Jacoba a bisa, ku e no ta dispuesto pa aseptá niun sorto di preshon.
“Mi ta lamentá ku ta bou di e sirkunstansianan aki nos mester atendé problema den e pais aki”, el a añadí.
El a primintí e sindikato STU di lo tuma kontakto bèk, pero ku di ke laga e asuntu mas tantu posibel den man di diputado di Anthony Godett ku ta esun responsabel pa transporte públiko.
Ayera tardi mes, partidonan a sinta na mesa.
Diputado Godett a splika e delegashon di STU, ku e dokumento di vishon pa un transporte públiko nobo mester pasa reunion i haña aprobashon di Bestuurscollege promé ku e bira un dokumento públiko.
Komo tal, no por repartí e dokumento ni papia riba dje ainda ku partidonan enbolbí.
E mandatario a primintí STU, ku den kareda di fin di mei e ta spera di por manda kopia pa tur esnan enbolbí. Partidonan lo haña sufisiente tempu – un te dos luna – pa nan duna nan reakshon riba dje.
Pa fin di yüli awor, e mandatario ta spera di sinta na mesa ku e partidonan aki pa weta si por yega na un akuerdo.
E mandatario a hasi un apelashon riba miembronan di STU pa laga loke sali den publisidat pa loke e ta. “Ta puru spekulashon”, el a indiká.
Durante e reunion di ayera no a papia riba kontenido mes di e dokumento.
Tampoko a papia riba oumento di preis di kombustibel, un dje problemanan ku ta primi masha hopi serka e shofùrnan di bus.
Diputado Godett a splika e sindikato, ku esei ta kai bou di responsabilidat di diputadonan Humprey Davelaar I Eugène Rhuggenaath. Pa djabièrnè awor, tin un otro reunion planiá ku STU pa 9’or di mainta. Godett a anunsiá ku e ta dispuesto pa fungi komo konsehero di e sindikato, pa garantisá ku kosnan ta kana mihó den futuro.
E problema prinsipal ta e hecho ku e sindikato falta informashon, di akuerdo ku diputado Anthony Godett.