WILLEMSTAD - Kiko ta maneho di gobièrnu, ora resultá ku mas ku un invershonista mustra interes pa e mesun pida área pa desaroyá proyekto? Kon ta atendé ku nan? Kiko ta e kriterionan ku ta usa pa determiná finalmente ken ta haña e tereno?
Preguntanan ku vários miembro a hasi ayera tardi, na momentu ku Konseho Insular a bini huntu den un reunion públiko pa diskutí e desaroyonan rondó di e área di Rif. E reunion aki tabata pidí pa partidonan di oposishon.
E motibu ta konosí pa tur hende: tin dos grupo ku ta interesá pa ehekutá un proyekto grandi mionario na e sitio aki, pero tin un diskushon ta ken lo mester haña preferensha.
E proyekto ta un proyekto ku karakter turístiko, ku mester forma parti di desaroyo ku ta tumando lugá den e área. E ta nifiká alabes ku e fasilidatnan deportivo ku tin awor aki riba Rif lo disparsé.
E problema sinembargo ta, ku den seno di Bestuurscollege (koalishon), tin pensamentu diferente ken lo mester haña e derechi pa desaroyá e área.
Reportadamente partidonan PAR i PNP lo ta na fabor di e grupo Meta Corporation ku ta konstruyendo kaba Hotel Renaissance den e mesun área aki, miéntras ku Frente Obrero a ekspresá sosten pa grupo Cayco, un grupo venezolano ku tambe aparentemente ta finansieramente hopi fuerte i ku ta kla pa kuminsá mesora, manera nan mes a indiká.
E reunion di ayera – manera por a spera – a konsentrá su mes riba e preguntanan ku tin rondó di e desaroyo aki na Rif.
Miembro di frakshon di Niun Paso Atras mr. Aldebert Rooijer por ehèmpel a para ketu na importansia di un proyekto asin’aki pa Kòrsou.
Tradusí den kosnan konkreto, kuantu kupo di trabou un proyekto asin’aki lo krea? Di kuantu invershon nos ta papiando? Pero mas importante ainda: kiko ta maneho di gobièrnu den un kaso asin’aki? Pa ken lo skohe? ta loke Rooijer tabata ke sa.
Drs. Dennis Jackson (PAR) a kuestioná e motibu ku oposishon a pidi e reunion. El a bisa di ta konsiderá ku hopi biaha no ta bai pa kontenido di loke ta trata. El a bisa ku oposishon den mayoria kaso ta pidi un reunion ku e pensamentu di krea broyo.
“Mester tin algu negativo semper. Sea ku kas di koalishon ta na kandela, ku gobièrnu ta aktuando ilegal, ku gobièrnu ta bai kai. Semper mester tin un parti di skuridat den e asuntu,” asina Jackson a trese dilanti.
Jackson a rekòrdá ku un tempu Kòrsou tabata den un otro posishon. Tabatin tempu ku nos tabata roga pa invershonista den e pais aki. Ironia di bida ta, ku awor nos ke pone kondishon pa un invershonista bin invertí aki, el a bisa.
Jackson tambe tabatin pregunta den direkshon di kiko ta maneho di gobièrnu.
Su kompañero di partido Remco Gomez tabata un poko mas práktiko den su pensamentu. “Pa ami, no ta kuestion di ken ta haña i ken no ta haña. Pa ami ta un kos ta importante: si e proyekto ta bon pa Kòrsou, nos ta sostené esaki”, asina Gomez a indiká.
Vários miembro mas di Konseho Insular a puntra gobièrnu kiko ta e maneho i pa ki dia por spera un konklushon di e diskushon ku ta andando awor aki.
Na momentu ku miembronan a kaba e promé buèlta di pregunta, ya tabata den kareda di mitar di nuebe. Diputado Anthony Godett a bisa, ku mirando e kantidat di pregunta ku miembronan a lansa, e mester di sigur un siman di tempu pa prepará e kontestanan.
Gezaghèber Magali Jacoba a anunsiá e momentu ei, ku e ta posponé e reunion te dia 13 di mei 9’or di mainta.