Minister di Salubridat Omayra Leeflang: 

WILLEMSTAD – Un pregunta interesante ta vislumbrando ta ken mester paga pa e gastunan di kuido médiko di ilegalnan den nos pais, prinsipalmente esnan ku ta bai Sint Elisabeth Hospital (SEHOS). E suma di aña pasá ku ketu bai ta habrí ta 3.4 mion florin loke ta pone un preshon riba operashon di SEHOS. Pa haña un klaridat, SEHOS a disidí di kuminsá un kaso den korte tantu kontra Gobièrnu di Kòrsou komo Gobièrnu di Antia.
Den e situashon ku tin aktualmente, SEHOS no por ninga di duna un pashènt trato médiko. Maske ki situashon e ilegal ta den, e mester kumpli ku e parti di kuido (zorgplicht). Esei ta pone un preshon enorme riba e instituto, komo ku e ta duna kuido, tin biaha hopi spesialisá, sin garantia ku e ta haña pago pa e trato aki.
“Nos ta bisa bon kla, ku ta Gobièrnu di Kòrsou mester paga”, asina minister Leeflang a bisa LA PRENSA den un entrevista riba e situashon aki. Segun e minister, e lei di atmishon i ekspulshon di stranhero ta en bèrdat un lei sentral. Pero e maneho riba kòntròl di stranhero ta un outoridat di Gobièrnu di Kòrsou (Gezaghèber). Komo ku no ta kontrolá den forma efisiente ta kousando e problema aki. Ta kaminda e outoridat ta, einan e responsabilidat ta”, asina e minister a bisa, referiendo na e situashon ku tin awor aki ku ta Gobièrnu di Kòrsou, den e kaso aki Gezaghèber, ta enkargá ku e aspekto di dunamentu di pèrmit di estadia. Si mester ekspulsá hende for di un teritorio, esei ta tarea di Gobièrnu di Kòrsou, asina e minister a bisa.
E minister a bisa, ku ya kaba Gobièrnu di Antia a informá tantu Hospital mes komo Teritorio Insular di Kòrsou riba su posishon. “Pero tin algun ámtenar ta sigui pèrsistí den e kronkel ku e outoridat i responsabilidat ta di Gobièrnu di Antia, algu ku nos ta rechasá”, asina e minister ta bisa.
El a ripití, ku Gezaghèber ta entre otro un “landsorgaan”, pero ta e teritorionan insular tin e kompetensia di atmishon i ekspulshon. “Ta e teritorionan mester saka nan. Imaginábu ku Gobièrnu di Antia mester bai paga kuido médiko pa tur ilegal riba e islanan antiano. Ta na unda e ta kuminsá. Nos no tin e instrumento legal pa saka nan. Un biaha mas e responsabilidat ta e ora ei serka e outoridat kompetente ku si tin e outoridat aki”, asina e minister a bisa.