Lorito ta yama tur hende un felis djarason. E desishon di DP i su Lider pa banda Aliansa Patriótiko sigur ta un desishon lat, pero asertá. DP no por hasi otro ku defendé su lider, ounke opviamente ku Norbert no ta sali liber for di e provokashon ku a tuma lugá i ku a kost’é un wanta. Pero bou di ningun sirkunstansia por aseptá un kos asina aki. Bo’n ripará ku for di despues di e insidente aki Nelson Boroto a bai skonde. Ta fin di luna, tempu pa bai kobra. Por ta nos lo tende di dje den e dianan aki.
*********
Nos a tuma nota di e deklarashonnan di Nelson Navarro indikando ku e kaso George-Pierre ta un kaso entre e dos partidonan i no di Aliansa Patriótiko. Nos ta desapuntá den e ponensia aki, pasobra no ta pidiendo Aliansa Patriótiko pa duna un opinion riba e kaso (ounke esei no ta mal idea), pero ta pidi polítikonan en general pa duna nan punto di bista riba un agreshon verbal i físiko ku a tuma lugá kontra un kolega polítiko i representante di pueblo. Bo no mester ta den niun Aliansa pa bo duna opinion. Nos ta spera ku komo lider polítiko ku ta promové norma i balor (den polítika tambe!) ku tur esnan ku ta stima desensia i bon kondukta ta tuma posishon. Nelson a desapuntá nos den e sentido aki.
*********
Nos a spera un opinion tambe di MAN, ku semper nos tabatin komo un partido di desensia i órden. Pero MAN tambe a keda ketu i no a duna opinion. Un kos por ta tur importante ku tin, pero si pa yega na e kousa noble aki, tin desórden anto mihó no kuminsá mes. Nos a bisa Charles i otronan den MAN na diferente okashon, pa no atendé ku breu, pasobra breu ta pega na bo! Di e otronan bo no por spera otro i p’esei nos no ta komentá nan mes!
*********
Nini un biaha mas a haña ta bon pa ataká invershonistanan i di un forma ku sigur no ta aseptabel. Lorito ta ripití, ku no tin nada kontra pa bo ta krítiko, pero semper bo tin ku laga e hende den su dignidat. Komo un hende ku e mes a sufri hopi di krítika inhustu, Nini mester sa esei mihó ku tur hende. Tin biaha ta mihó skohe bo palabranan mas mihó.
*********
Foto lorito

Pa Nini no kere ku nada e no ta hasi bon, Lorito kier a dun’é un kòmplimènt awe pa su manera di atendé ku e asuntu di agrikultura i nos ta spera pronto krio di bestia tambe. Nini komo un di e pokonan na Kòrsou te awor aki ta realisá kon serio e krísis di kuminda ta i kon duru e lo bai ta pa nos. Nos ta spera ku e ta sigui stimulá nos pa nos bai planta i bira mas selfsupporting riba e tereno aki. No tin moda di hasi!
*********
Un saludo pa MCB tambe. Na Colon nan a sorprendé nos ku un paki di simia di promèntòn. Nos a primintí nan, ku asina ku e mata di promèntòn pari, nan ta haña for di e promé la. Masha bon idea di MCB pa dediká atenshon na nos medio ambiente. Nos ta spera, ku otro korporashonnan tambe sigui e ehèmpel aki. Nos no mester tin bèrgwensa ku un biaha mas MCB tabata e promé! E kos aki ta un kousa nashonal.
********
Nos ta preokupá pa e desaroyonan den enseñansa awor ku a konfirmá tur informashon. Nos no a keda kontentu ku deklarashonnan di minister di Enseñansa ku nunka tabata un defensor fuerte di papiamentu. Ban wak kiko e otronan ku a lucha pa hopi aña ta bai hasi. Nos ta keda te aki awe. Un pabien ainda pa eks diputado Frensel ku a kumpli 50 aña ayera. Nos no a ripará nada! Kuida kurpa i te mañan ku Dios su poder!