WASHINGTON, Merka, - E prekandidata demókrata pa Kas Blanku, Hillary Clinton, ta spera rekoudá 10 mion dollar riba Internet, komando di su kampaña a informá, un dia despues di su viktoria na Pennsylvania riba su rival Barack Obama.
“Fo’i ora a deklará Hillary Clinton komo ganadó ayera, te dia di awe, nos a rekoudá, kere òf no, 10 mion dollar riba Internet, e mayó kantidat optené!”, Presidente di e kampaña di Clinton, Terry McAuliffe, a bisa.
“A logra esaki ku 50 mil donante, ku ta nobo pa nos kampaña. E donantenan a gusta loke nan a mira den Hillary Clinton. Ta ku basenan chikitu, nan a duna 10, 20, 30, 40, 50 dollar”, McAuliffe a señalá den deklarashonnan na kadena MSNBC.
El a agregá ku e organisadónan di e kampaña tin konfiansa pa logra e rekursonan nesesario pa e próksimo kontiendanan elektoral pendiente, inkluyendo 6 di mei na Indiana i Nort Carolina, ku ta e estadonan mas chikitu ku Pennsylvania.
E Hefe di kampaña a ninga e krítikanan di korant The New Yort Times, ku a indiká ayera den un editorial ku Clinton mester asumí su responsabilidat pa un “negatividat” ku no solamente ta perhudik’é òf Obama, sino e demókratanan.
Partikularmente, e korant a kuestioná ku Clinton a hasi menshon den su propaganda na Pennsylvania e atentadonan di 11 di sèptèmber 2001, imágennan di Osama bin Laden, e kolapso di Bolsa di New York na 1929 i e krísis di misilnan na Cuba.
McAuliffe a manifestá ku den último 14 luna, Clinton a risibí “atakenan” di kampaña di Barack Obama, inkluyendo anunsionan na televishon i publisidat negativo via pòst.
E Presidente di kampaña di Clinton a bisa ku e dama senador di New York a gana na estadonan grandi manera California, Texas, Ohio, Pennsylvania, New York i New Jersey i ku el a keda faboresé na Florida i Michigan, kaminda a deskartá e votonan, pasobra a violá leinan di e partido pa a adelantá e fechanan di e elekshonnan primario.
“Nos tin algun kontienda ku ta bai bin: West Virginia, Kentucky, Indiana i Nort Carolina. Na Puerto Rico lo bai tin un gran partisipashon!”, McAuliffe a apuntá.
Di su banda, ko-presidente di kampaña di Barack Obama, Bill Daley, a bisa MSNBC ku e senador pa Illinois a logra redusí na Pennsylvania e bentaha di Clinton di 25 pa 10 punto porsentual.
El a indiká ku Obama a gana na Virginia, Colorado, Wisconsin i Missouri, ku el a konsiderá importante pa krea un koalishon diferente pa derotá e virtual kandidato republikano, John McCain, den e elekshonnan di 4 di novèmber benidero.
Den entrevistanan ayera na vários kadena di televishon despues di su triunfo di djamars último, Clinton a destaká importansia di e voto popular si inkluí 2.3 mion votante di Florida i Michigan, ku no a keda kontá komo kastigu, pasobra a kambia e fecha di e elekshonnan primario.
Di otro banda, el a konsiderá komo “un bèrgwensa” ku Obama ta ninga debatí na Indiana i Nort Carolina, “ora tin asina tantu kos den wega i e dos estadonan aki meresé un debate”.
Relashoná ku si e prolongá kontienda por perhudiká Partido Demókrata, Hillary a rekòrdá ku su esposo, eks Presidente merikano Bill Clinton, a sigurá nominashon resien na yüni 1992, i den enkuestanan e tabata tras di kandidatonan George Bush tata i Ross Perot.
Den e lucha pa logra un total di 2.025 delegado pa sigurá nominashon di Partido Demókrata, Obama te na e momentu aki ta konta ku 1.719 delegado i Clinton ku 1.586 delegado, segun kálkulonan di kadena informativo merikano CNN.

Foto; Hillary Clinton 2404

Hillary Clinton selebrando su viktoria.

Foto: Barack Obama 2404

Senador pa Illinois, Barack Obama, kende ta rival di Hillary Clinton den e elekshonnan primario demókrata.

Foto; Terry McAuliffe 2404

Terry McAuliffe, presidente di kampaña di Hillary Clinton.

Foto: Bill Daley 2404

Bill Daley, ko-presidente di kampaña di Barack Obama.