BARCELONA – Tur dos promé wega di e semi final di Champions League a kaba den un empate. Despues ku anteriormente djamars Liverpool i Chelsea a empatá dramátikamente, ayera den Stadion Nou Camp Manchester United no a yega masha leu i a saka un empate komo bishitante. E oportunidat mas kla di e enkuentro di ayera tabata na di tres minüt na momentu ku Cristiano Ronaldo, e goliadó te awor di e torneo a kobra un pinalti, pero e bala a bai dal kontra pal’i gol. Manchester a haña e pinalti despues ku e bala a bai dal den man di defensor argentino Gabriel Milito den e área penal. E empate di ayera no a laga masha konklushon pa e próksimo partido ku lo tuma lugá djamars awor na Inglatera, ounke Barcelona tin un bentaha komo ku e no a pèrmití gol di su kontrinkante den su kancha. E próksimo partido lo tuma lugá na e kancha di Manchester na Old Trafford. “Mi no a anotá, pero esei no ta un problema. Lo mi anotá na Manchester”, asina Cristiano Ronaldo a bisa.
Despues di e fayo di Cristiano Ronaldo, Manchester a kai den un lòk i a ekshibí poko di e potensia ofensiva ku e ta demostrá siman tras di siman den Premier League, kaminda e ta lider di e torneo di e aña aki i na punto di bira kampion un biaha mas. E klup ingles a bai kai bèk den defensa i a laga e inisiativa di Barcelona ku sinembargo no a generá masha peliger di gol.
E hungadó di Barcelona Xavi a bisa ku Barcelona a hasi tur loke tin pa gana, no opstante e pinalti. “Nos a dominá 90 minüt i nos a hasi tur loke nos tabata por i e hendenan a bai kas kontentu. Nos ta kontentu pa loke nos a pone riba kancha, pero no ku e resultado”, asina Xavi a bisa. Lionel Messi, regresando tereno for di despues ku el a haña un leshon serio, a bai bin na banda drechi di kancha, pero e no a logra krea peliger den e defensa será di Manchester United. Andrés Iniesta a drenta den e área ingles na di 10 minüt di wega, pero su paso retrasá no a enkontrá kompañero. Kontra un United tabata defendé tur ku tin i a laga Wayne Rooney i Cristiano Ronaldo dilanti pa e kontragolpi. Barcelona a buska tur manera pa krea peliger di gol, pero no tabatin e kontundensia pa pone e gol di Manchester defendé pa e kiper ulandes Edwin van der Sar na peliger. Na di 21 minüt di wega Van der Sar a wanta un kabesaso sin masha peliger di e mèksikano Rafael Márquez. Marquez a haña un tarheta hel ayera i e no por hunga den e partido na Inglatera pa motibu di akumulashon di karchi hel. Pero Barcelona lo por konta ku Carles Puyol ku ayera no a hunga pa motibu di suspenshon di un wega.
Despues di dos wega di semi final por bisa ku tur opshon ta habrí ainda pa e final ku lo tuma lugá na Rusia otro luna.

OS: Cristiano Ronaldo (Manchester United), e máksimo goliadó te awor den Champions League, no por kere ku el a faya un pinalti den e promé minütnan di e wega di ayera kontra Barcelona den stadion Nou Camp. E wega a kaba 0-0.