LIMA – E kapitan di e selekshon di Perú, Claudio Pizarro a haña outorisashon di FIFA pa eventualmente bai un tribunal deportivo internashonal una bes ku tur posibilidat interno agotá pa e apelá e sanshon fuerte ku a imponé kontra dje pa falta di disiplina. Pizarro no por hunga durante 18 luna pa selekshon di Perú despues ku e Komishon di Hustisia di Federashon Peruano di Futbòl a determiná ku e i tres otro hungadó a kometé un falta grandi di disiplina, na momentu ku nan tabatin un fiesta ku alkohòl i muhé durante un konsentrashon di selekshon di e pais na novèmber último.
Pizarro ku ta hunga pa Chelsea ta e úniko ku a apelá e sanshon. E otro tres miembronan di selekshon ku a haña suspenshon Santiago Acasiete di Almería (Spaña), Jefferson Farfán di PSV Eindhoven (Ulanda), i Andrés Mendoza, di Steaua Bucarest (Rumania) a aseptá e sanshon ounke nan ta konsiderá e kastigu unu masha severo.
E representante di Pizarro Carlos Delgado a bisa ayera na radio, ku FIFA a manda un karta p’e djamars den kua FIFA ta duna outorisashon pa hiba e kaso dilanti di e Tribunal di Arbitrahe Deportivo ku sede na Suisa. Delgado a bisa, ku a risibí e karta aki ku masha alegria, komo ku e ta un meta ku Pizarro tabatin su dilanti. “E karta ta duna nos garantia ku nos por saka e proseso aki for di man di Federashon Peruano di Futbòl, pasobra nan no por a duna nos garantia ainda di ophetividat. Ademas Pizarro tin chèns pa defendé su mes internashonalmente ku wesnan ku ta leu for di e ambiente lokal di Perú”, asina el a bisa. Segun e karta, si un di e dos partidonan no ta di akuerdo ku e desishon di apelashon na Perú, nan por akudí na e tribunal internashonal. E desishon di e tribunal na Suisa sinembargo ta e último posibilidat i kada banda mester respetá e desishon.
Pizarro a insistí, ku e no a partisipá na aktonan di falta di disiplina i ku e kaso a kousa daño enorme na su karera internashonal.