WILLEMSTAD - Trahadónan di Wit Gele Kruis a keda satisfecho ku e splikashon ku nan a risibí durante di e reunion e siman aki ku Direktiva di e fundashon.
Algun dia pasá e trahadónan a akshoná, despues ku nan a sinti ku entre otro nan seguridat di trabou ta na peliger. Riba insistensia di e sindikato di personal di enfermeria, CBV, Wit Gele Kruis a manda yama e trahadónan pa un reunion.
Meta di e enkuentro tabata pa tene trahadónan trankil, loke e direktiva a logra tambe. Johnny Augusta, miembro di direktiva di CBV, a splika ku e sindikato ta satisfecho ku e informashon ku su miembronan a haña serka direktiva Fundashon Wit Gele Kruis.
Sin ku el a bai spesífikamente riba kontenido dje informashon ‘trankilisante’ ku e trahadónan a risibí, Augusta a referí en general na e puntonan di atenshon ku tabatin den direktiva diario i tambe serka Konseho di Supervishon. ‘Mi ta kere ku internamente tabatin problema ku a kousa preokupashon grandi serka e trahadónan’. E preokupashon aki tabata relashoná ku nan doño di trabou i desaroyo di nan trabou’, Augusta a splika.
CBV sinembargo ta kontentu ku e desaroyo positivo di e siman aki unda e trahadónan a haña e splikashon deseá. Konseho di Supervishon i direktiva di Wit Gele Kruis i e trahadónan a keda kontentu.
Enkuanto e temor pa puestonan di trabou, ku tabata reina serka e trahadónan, okashoná dor di e proyekto di Wit Gele Kruis pa konsentrá riba servisio pa turistanan, Augusta a splika ku e empleadonan a haña e splikashon relashoná ku e asuntu aki tambe i ku nan keda trankil. ‘Mi ta kere ku e trahadónan a keda satisfecho ku e informashonnan ku nan a haña serka direktiva diario i Konseho di Supervishon’, Augusta a ripití enfátikamente.