WILLEMSTAD- Nashonnan Uní ta bai hala atenshon di Ulanda relashoná ku e shen porshento kòntròl na Schiphol i lo pone preshon pa stòp ku e forma aki di kontrolá biahero aki. E Plataforma Nashonal Ulandes pa Historia di Sklabitut, ta konvensí ku esaki ta loke ku ta bai pasa.
Manera ta konosí biaheronan for di Antia i Aruba ku yega Schiphol tambe ketu ta someté na e kòntròl intensivo aki.
Awe Plataforma Nashonal Ulandes pa Historia di Sklabitut a entregá ofisialmente un keho kontra dje kòntròl aki.
Aktualmente e presidente di e Plataforma Ulandes, Iwan Leeuwin ta asistí na e Konferensha Derbin Review, na Geneve. Ta trata di preparashon di e konferensha ku ta tuma lugá na 2009. Leeuwin a pone na atenshon di e Konferensha e tan diskutí asuntu di e shen porshento kòntròl na Schiphol.
Durante dje konferensha internashonal aki, tin asistensia tambe di vários partisipante di desendensia afrikano. Serka e hendenan aki tambe e fenómeno di kòntròl shen porshento ta konosí. Ta resultá segun Leeuwin, ku den vários pais europeo, entre kua esnan afrikano e kòntròl shen porshento ta wòrdu apliká. ‘Pues no ta Ulanda so ta apliká e sistema aki’. Biaheronan prosedente di prinsipalmente Afrika ta someté na e kòntròl rigoroso i ofensivo. E kòntròlnan aki segun Leeuwin ta diskriminatorio, pasobra ku nan ta wòrdu konsentrá riba prinsipalmente afrikanonan di koló. ‘Ta trata debidamente di un forma di diskriminashon’, Leeuwin a enfatisá.
Pa loke ta trata kiko Leeuwin ke logra na Geneve, enkuanto di e kòntròl shen porshento, el a splika ku e konferensha ta dediká atenshon entre otro tur forma di anti-rasismo i deskriminashon. I e hecho ku e trato diskriminatorio ta tuma lugá na Schiphol, ta algu ku e plataforma ke haña atenshon pe.
Oido pa e problema
Leeuwin ta satisfecho pa e hecho ku tin oido pa e situashon menshoná na Geneve. Entre otro e representante di Ulanda tabatin dos kombersashon formal ku dos funshonario di Nashonnan Uni. ’Nan a indiká ku pa atendé e kaso,mester tin un keho ofisial i despues ta bira posibel pa pone e reklamo riba agènda’. E funshonarionan a primintí di perkurá ku for di Nashonnan Uní, akshonnan wòrdu tumá pa bringa e fenómeno aki. Mesora e Plataforma a tradusí na ingles, e ‘petitie’ ku na Ulanda el a entregá riba e asuntu aki ku lo bai pa Nashonnan Uní.
E loke ku ke wòrdu lográ ta pa den e kuadro di derechonan humano igual, anti deskriminashon i rasismo, no tolerá e tipo di aktonan aki. ‘E preshon ei mester bin di parti di Nashonnan Uní riba Ulanda pa stòp ku e kòntròlnan aki’.