WILLEMSTAD - Diputado di enseñansa, Marilyn Alcala-Wallé, a keda parsialmente sorprendí pa e desishon di Direktiva di Skol pa re-introdusí hulandes komo idioma di instrukshon. Regularmente e diputado tabata informá su mes, pa medio di enkuentronan mensual ku e Direktiva di Skol Katóliko, enkuanto e puntonan di atenshon den enseñansa di fundeshi. E hecho ku e deliberashonnan riba e asuntu aki a kue un rumbo un tiki mas rápido hustamente na e momentu ku e diputado tabata hasi un bishita di trabou na Hulanda, a kousa e strañesa. “For di un distansia tabata hopi ferfelu pa sigui atendé ku e asuntu aki”.
Segun Alcala-Walle, e hecho ku direktiva di Skol Katóliko a disidí ku e ta bai bèk na hulandes komo idioma di instrukshon, ta indiká ku e tin motibunan hustifiká pa tuma e desishon aki. “Nos tur ta konsiente ku e edukashon pa e muchanan den nan idioma materna, ta esun di mas mihó pa nan”. Segun e diputado e tin e informashon ku no ta e intenshon pa bai bèk kompletamente na e sistema anterior, pero ku e lo wòrdu adaptá. “RK Schoolbestuur tambe ta konsiente ku e mucha por haña enseñansa i formashon, ta den su propio idioma”.
Ta e intenshon di e diputado pa den konsulta ku su kolega, minister di enseñansa, disidí kon ta bai asumí nan responsabilidat den e desaroyo ku a surgi na direktiva di Skol Katóliko enkuanto e idioma di instrukshon i disidí kon ta bai sigui.
E diputado a sigui bisa ku dia 8 di mei awor, Gobièrnu ta reuní ku tur direktiva di skol. Durante dje enkuentro aki ta trata tur e puntonan di atenshon den kategoria. Un desishon mester kai, kiko ta e medidanan ku mester tuma riba término kòrtiku i kiko ta e kosnan ku mester kaba di atendé riba un periodo mas largu.