CARACAS, Venezuela, - Un kumbre di emergensia di paisnan ku ta integrá “Alternativa Bolivariana para las Américas” (ALBA) a ekspresá na Caracas su respaldo pa Gobièrnu di Presidente boliviano Evo Morales i a rechasá e referèndem ku lo bai tuma lugá 4 di mei, pa konsiderá esaki ilegal i atentatorio kontra unidat di Bolivia.
E deklarashon di e aliadonan polítiko di Presidente Morales a provoká un mayó distansia entre e Hefe di Estado i oposishon, ku a determiná manda un emisario na Colombia i Mexico pa informá, for di otro perspektiva, loke ta okurí na Bolivia.
E enkargado di e labor aki lo bai ta Presidente Senado, Oscar Ortiz (Partido Podemos), kende awe lo reuní ku outoridatnan colombiano i djaluna ku esnan di Mexico, asina a keda informá durante un Konferensia di Prensa durante kua a pidi komunidat internashonal manda na Bolivia mishonnan humanitario p’e riesgo di konfrontashonnan na mei.
E kumbre di ALBA, na kua ademas di Morales i Presidente venezolano Hugo Chávez a partisipá Presidente di Nicaragua Daniel Ortega i Vise Presidente di Cuba Carlos Lage, kendenan a aprobá un deklarashon ku ta denunsiá un “intento separatista ku ta atentá kontra Bolivia, atrabes di un pretendido referèndem konvoká den violashon di Konstitushon i e leinan bolivariano”.
E referensia ta e referèndem ku lo bai realisá apesar ku Gobièrnu i Korte Nashonal Elektoral a bai kontra e proseso aki, pa ta ilegal.
Den e dokumento, e mandatarionan a ratifiká nan posishon di “no rekonosé niun figura hurídiko ku ta pretendé separá for di e Estado nashonal boliviano i vulnerá integridat teritorial di Bolivia” i nan a pidi pa resolvé e krísis polítiko “sin inherensia eksterno di niun tipo”.
Presidente Morales a gradesí solidaridat di “e movementu aki ku hopi klaridat ideológiko i programátiko pa sali for di nos problemanan”, i el a rekòrdá ku otro paisnan a pronunsiá riba situashon di Bolivia, eksepto Merka, di kua e Embahador, Philip Goldberg, a pidié fiha un posishon.
“E tin ku bisa algu, inkluso, si ke tumba Evo Morales!”
E Embahada di Merka na Bolivia a indiká den un komunikado ku no ta komentá riba asuntunan interno.
Gobièrnu di Merka konstantemente a ripití ku ta apoyá unidat i demokrasia di Bolivia i su institushonnan demokrátiko. Tambe nos a manifestá ku e proseso di referèndem na e pais aki, ta un asuntu netamente interno di Bolivia i di e bolivianonan”.
Den e kumbre di ALBA, e Presidente venezolano a denunsiá ku Merka ta promové divishon di Bolivia mediante akshonnan manera e referèndem di 4 di mei, ku e meta di kontrolá e rikesa gasífero di e pais.
“Mas ayá di e diskursonan, tin un posishon kla: Merka i su Embahador na La Paz (Bolivia) ta impulsando un plan pa kibra Bolivia i tumba Gobièrnu di Evo Morales!”, Chávez a denunsiá, pa despues pidi Merka saka su mannan askeroso imperialista for di Bolivia”.
Segun Chávez, e peliger no ta solamente pa Bolivia, sino pa e region.
“Tin ku bisa e otro Gobièrnunan di Suramérika. Si gòlpia Bolivia, e ora ei ta gòlpiando Suramérika kompletu, pasobra Bolivia ta e kurason di Suramérika. Si desestabilisá Bolivia lo kibra e frágil ekilibrio energétiko. Ta algu bon serio!”, e lider venezolano a señalá.
Na Bolivia, oposishon a rechasá e postura adoptá pa e paisnan miembro di ALBA.
“E deklarashon aki no ta yuda ku nada. E opheto ta frena e referèndem!”, Presidente di Komité pro Santa Cruz, Branko Marinkovic, a opiná.
Miéntras tantu, Hefe di Partido Podemos, Jorge Quiroga, a konsiderá ku esaki ta un reakshon di Presidente venezolano Hugo Chávez, kende sa ku esaki ta prinsipio di fin di un régimen di pisa patrianan chavista”.
Representantenan di oposishon polítiko i regional a rechasá e posishon adoptá ayera n’e kumbre di ALBA, pa konsiderá ku ta intervení den asuntunan interno. Kontrali, ofisialismo a aploudí e echo.

Foto: Evo Morales Hugo Chavez 2404

Presidente di Bolivia Evo Morales, man robes, ta brasa Presidente di Venezuela Hugo Chávez durante kumbre di ALBA na Palasio presidensial Miraflores na Caracas.

Foto: Evo Morales Hugo Chavez 1 2404

Presidente boliviano Evo Morales, man robes, i Presidente venezolano Hugo Chávez ta papiando ku otro durante kumbre di ALBA.

Foto: ALBA paisnan miembro 2404

Paisnan miembro di ALBA durante e kumbre na Caracas ayera. D.r.p.d.: Vise Presidente di Cuba, Carlos Lage; Presidente boliviano Evo Morales; Presidente venezolano Hugo Chávez; i Presidente di Nicaragua, Daniel Ortega.

Foto: Carlos Lage 2404

Vise Presidente di Cuba, Carlos Lage, ta papia durante kumbre di ALBA.

Foto; Daniel Ortega 2404

Presidente di Nicaragua, Daniel Ortega, papiando durante kumbre di ALBA.

Foto: Branko Marinkovic 2404

Presidente di Komité pro Santa Cruz, Branko Marinkovic.