WILLEMSTAD - Miembro di Tweede Kamer pa partido VVD Johan Remkes ta preokupá pa e direkshon ku a tuma pa lanta kuerponan polisial riba e islanan di Antia, unabes ku e kambionan estatal bira un hecho. Remkes a formulá pregunta na gobièrnu riba su preokupashon.
Remkes ta basa su mes riba e rapòrt ku a sali riba funshonamentu di kuerpo polisial ku ta devastador pa e kuerpo. Un “dodelijk rapport”, ta e manera ku Remkes a deskribí esaki.
El a bisa, ku tin vários pasashi den e rapòrt ku ta pinta un situashon mas serio ku e mes a kere. Mi ta kere ku klaramente tin un diferensha di persepshon, el a añadí.
“Loke e rapòrt ta konstatá ta, ku e kuerpo ta funshoná bou di nivel, e kalidat ta malu, e parti di hasi investigashon a keda atras den desaroyo, e organisashon físiko di e kuerpo ta laga hopi di deseá. Pa kolmo, polis na islanan abou no ta dominá ulandes na drechi, miéntras ku na Islariba no ta dominá ingles sufisiente.
Evidentemente e problemanan no ta data di awor aki, pero ta resultado di un maneho defisiente di hopi aña largu”.
Johan Remkes, manera ta konosí, tabata minister di Asuntunan Interior na Ulanda na kuminsamentu di añanan nobenta.
Sinembargo, e no ta konsiderá ku e tambe tabata responsabel pa esaki. Esun promé responsabel ta e mandatario enkargá ku Antia, el a bisa, referiendo na e hecho ku ta sea e minister òf sekretario di Estado enkargá ku relashon den Reino ta responsabel.
“Pero lo mi hasi pregunta tòg”, segun Remkes. El a bisa ku e ta konsiderá ku e situashon aktual lo tin konsekuensia pa e struktura nobo di polis, unabes ku e kambio estatal di e islanan tuma lugá próksimamente.
Remkes a bisa, ku e ta kere mester evaluá seriamente, si mester sigui ku e idea di un kuerpo polisial pa kada isla.
“Mi ta di akuerdo ku ekspertonan ku tres kuerpo pa e islanan chikitu no ta rekomendabel. E eskala lo ta muchu chikitu, e kuerpo lo sali muchu karu. Di otro banda, e distansia entre Boneiru, Saba i Statia ta mucha grandi pa un solo kuerpo pa nan tres. Mi ta kere ku mester pensa e asuntu aki muchu mas profundo,” Remkes a bisa. E ta teme ku e tempu aya a tuma e aktitut pa kumpli numa ku deseo di e islanan.
Remkes a bisa di otro banda, ku asumiendo e posishon aki, e ta bon konsiente ku bo no ta solushoná e problemanan interno di kuerpo polisial.
E rapòrt menshoná ta bisa tambe, ku mester invertí den e kuerpo pa drecha su kalidat i funshonamentu.
“Invershon ta kosta plaka. P’esei mi ke sa kiko ta e konsekuensia finansiero di e rapòrt. Ulanda por yuda, pero mi ta konsiderá ku esnan promé responsabel pa esaki ta serka e islanan di Antia mes,” Johan Remkes a duna di konosé finalmente.