WILLEMSTAD - Parlamentu antiano, ayera nochi a aprobá presupuestonan di Landsloterij di 2000 te ku 2003. Un kos insólito, asina tantu parlamentu komo gobièrnu a koinsidí. Hustamente p’esei mes, riba proposishon di prinsipalmente parlamentario mr. Faroe Metry, pero tambe di ingeniero Dwigno Puriel, lo bai studia e posibilidat pa den futuro presupuestonan di parlamentu no tin nodi di bini parlamentu mas pa aprobashon.
E presupuestonan ku Staten a haña ayera pa trata ta, di añanan 2000 te ku 2003, ke men 4 aña huntu.
“Honestamente mi ta puntra mi mes, kiko mester hasi ku e presupuestonan aki”, asina Faroe Metry a bisa.
El a mustra ku e situashon aki no ta algu normal, ya ku un presupuesto mester ser aprobá promé ku e aña fiskal pa kua e ta konta.
“En realidat nos mester tabata tratando kuentanan anual di e añanan menshoná awor aki. Awor, si presupuesto mes ta lat asin’aki, ta ki dia nos lo por haña e kuentanan anual?” Metry a puntra.
Pero pa Metry, e kos ta mas fundamental. E parlamentario a mustra, ku klaramente ta tratando aki di un lei antikuá, ku no ta kuadra mas ku nos tempu moderno.
“Pakiko presupuesto di Landsloterij mester bin parlamentu mes? Pakiko presupuesto di Landsloterij mester haña aprobashon di Staten i esun di por ehèmpel Fondo di Penshun APNA, di SVB i di Banko Sentral no? Es mas: e entidatnan aki tin muchu mas tantu plaka ta manehá, ku Landsloterij,” Metry a trese dilanti.
El a bisa, ku ta un hecho, ku e lei ta antikuá. Tur e entidatnan aki tin un struktura di tal manera ku internamente nan tin sufisiente kòntròl riba maneho finansiero. Un APNA, SVB òf Banko Sentral tin nan propio hunta di supervishon òf otro órgano ku ta hasi e trabou di supervishon sufisientemente.
Faroe Metry a bisa, ku a yega tempu pa weta si no por kambia e lei aki di tal manera ku e presupuesto no tin nodi di bini parlamentu mes.
“No solamente e ta skapa e entidat mas trabou, Staten tambe por dediká su tempu na kosnan ku tin muchu mas sentido”, Metry a aksentuá.
Su kolega Dwigno Puriel (MAN) tambe tabatin pensamentunan den e direkshon aki. Gobièrnu Sentral a anunsiá, ku lo manda pidi konseho hurídiko riba e posibilidat pa kambia e lei aki den futuro serkano.
Ku un sla di martin, presidente di Staten Pedro Atacho a seya aprobashon na presupuesto di aña 2000, 2001, 2002 i 2003. Esei a sosodé ayera nochi, ora 9’or tabata na punto di bati i el a nifiká tambe final di e reunion públiko di parlamentu antiano.