WILLEMSTAD - Lei ta bisa ku mester aprobá presupuesto den e aña promé ku e aña na kua e presupuesto ta referí. Ta esei ta balor di un presupuesto, pa bo sa adelantá kuantu sèn bo tin pa gasta i kon bo ta bai gast’é. Kon por ta posibel ku Landsloterij a drei ocho aña largu sin un presupuesto aprobá? Ta kon e kos aki a bai anto? Ta asin’aki nos ke drenta e status di pais outonomo den Reino?
Preguntanan skèrpi di parlamentario ingeniero Dwigno Puriel, durante tratamentu ayera nochi di presupuestonan di 2000 te ku 2003 den sala di parlamentu.
Puriel a bisa ku den sierto sentido por a papia di un dia históriko ayera. Históriko, pasobra porfin a trata e presupuestonan aki. Pero históriko tambe, pasobra ta un desepshon grandi ku un parlamentu mester trata presupuestonan asina bieu. Aki nos ta haña un dualismo grandi.
“Kon esaki por ta posibel? Unda e papel ku parlamentu mester hunga den e kaso aki a keda? Trata presupuesto dje bieu aki ta algu opsoleto, e ta manera ulandes ta bisa mosterd na de maaltijd. E kos aki ta superfluho,” Puriel a duna di konosé.
Segun e parlamentario, tur e presupuestonan a keda entregá demasiado lat. Konsekuentemente, nan a yega parlamentu lat tambe.
“Mi ta puntra mi mes si gobièrnu no tabata kapas pa atendé e asuntu aki na un manera diligente i entregá e presupuestonan aki na tempu.
Nos sa tende hopi biaha ku parlamentu ta tarda kos. Mi ta kere ku e biaha aki klaramente esei no tabata e kaso,” di akuerdo ku e parlamentario di frakshon di MAN.
“Ta bin aserka”, segun Puriel, “ku hopi biaha Komishon Sentral ta trata nan, pero e kontesta di gobièrnu ku mester bin riba preguntanan ku surgi tambe ta tarda.
Bou di niun sirkunstansia no por hustifiká ku e presupuestonan aki a yega Staten lat. No ta Staten ta traha lei? Si ta Staten tin e instrumento aki den su man, anto e mester kambia lei pa e funshonamentu drecha. Keda 8 aña largu den e situashon aki ta simplemente inaseptabel”, el a afirmá.
Pa Puriel sinembargo, ta muchu mas importante ki lès nos ta saka for di loke a sosodé. Hasi un fayo ta unu, pero ripití e fayo aki na mas ku un okashon mas, ta hasi e asuntu kompletamente otro, el a bisa.
Puriel a pidi pa dediká atenshon na presupuestonan di aña 2004 te ku 2009. “Nos tin gana di sa ki dia eseinan lo yega parlamentu”, el a bisa.
Dwigno Puriel a lansa un pregunta interesante ayera nochi den parlamentu.
“Kiko lo sosodé, si parlamentu disidí ku e no ta aprobá e presupuestonan aki? Mi ke sa ta kua presupuesto Landsloterij a usa durante tur e añanan ku a pasa, pa kua no tabatin aprobashon di parlamentu. Pa gobièrnu ta konta e regla, ku tanten e presupuesto nobo no ta aprobá, mester sigui usa e presupuesto bieu na e nivel di gastu ku esei tin. Esei ta konta tambe pa Landsloterij? Den e kaso aki, e lo mester a sigui usa presupuesto di 1999. Esei a sosodé tambe?” Puriel tabata ke sa.
E parlamentario, finalmente a ekspresá su desapunto pa e forma ku kosnan a kana den kaso di Landsloterij. Ta asin’aki nos ta pensa di drenta den e pais nobo ku yama Pais Kòrsou?” el a puntra finalmente.