ORANJESTAD- Awe pa 4’or di atardi, ta tuma lugar inauguracion di e cancha di basketball den e bario di Seroe Patrishi. Despues cu e proyecto di vivienda na Seroe Patrishi a keda finalisa, FCCA a reserva un pida tereno pa por construi un aerea di recreo pa e bario.
Como parti di e plan di FCCA pa eleva e calidad di bida den su complehonan di vivienda, construccion di aereanan pa recreo pa e hobennan cu ta biba den e complehonan aki tambe ta un prioridad. FCCA su meta primordial ta pa construi vivienda pa nos comunidad cu mester di uno. Adicional pa por crea complehonan di vivienda sigur y eleva e calidad di bida, FCCA ta hasi invercion den areanan di recreo. Pa por construi e aereanan aki ta rekeri bastante invercion.
E costonan ta halto en comparacion cu construccion di un vivienda. Sinembargo FCCA ta purba pa crea esakinan na un costo mas abou cu ta posibel, manteniendo e calidad pensando riba termino largo. Ta pesey hopi biaha e proyectonan aki ta tarda, pa e simpel motibo cu ta wordo sondea na un miho producto cu costo abou. Esey ta e factor tambe cu e proyecto di e cancha aki den e compleho di vivienda na Seroe Patrishi a dura asina largo.
Sinembargo awe ta asina leu cu esaki ta cla pa e hobennan di e compleho aki hasi uso di dje. FCCA kier encurasha e hobennan di e bario aki pa hasi bon uso di dje. Nos ta na altura cu tin hobennan cu ta hopi entusiasta te cu nan ta comete destruccion na varios di e aerenan aki. Un meta mester bira pa e otro hobennan den e bario cu si ta agradecido na e gesto aki pa evita cu otronan ta hasi destruccion na nan cancha. Nan mester para fuerte pa cuide. FCCA kier pa nan sa cu e cancha aki su inversion di placa ta basta halto y cu simplemente e la wordo construi na bienestar di e hobennan di e bario aki mes.
Pues mester cuide. No ta tur compleho di vivienda di FCCA tin un cancha asina bunita. E habitantenan y specialmente e hobennan di Seroe Patrishi mester ta orguyoso cu nan ta un di e prome-nan cu tin un cancha asina meymey di nan compleho.
Maneho di e cancha aki ta den man di e “Wijkbeheerder” di e bario aki cu lo stipula horarionan cu esaki ta habri.
FCCA ta felicita e habitantenan, y specialmente e hobennan di e bario di Seroe Patrishi cu nan cancha di basketbal.
Tambe FCCA ta invita su clientenan, habitantenan y hobennan di Seroe Patrishi y bencindario pa acudi na e celebracion di inauguracion di e cancha di basketball aki awe tardi pa 4or.