DAMASCO, Siria, - Funshonarionan di Gobièrnu di Siria a rechasá kategórikamente akusashonnan di Merka, ku nan pais ta konstruyendo un planta nuklear ku respaldo nortkoreano, kalifiká pa Organismo Internashonal di Energia Atómiko (OIEA) komo “serio”.
E Embahador sirio na Reino Uní, Sami Al-Kiyami, a afirmá ku “e akusashonnan aki ta ridíkulo!”
“Nos ta kustumbrá ku e tipo di alegashonnan aki for di dia ku Merka a invadí Irak. Nan lo rekòrdá e presentashonnan teatral riba e armanan di destrukshon masivo irakí”, e diplomátiko a señalá den deklarashonnan na agensia di notisia BBC.
Merka ayera a akusá Nort Korea di ta asistí Damasco den konstrukshon di un planta nuklear “ku no tin metanan pasífiko”.
E edifisio, sospechosamente paresido na esun na Nort Korea, di akuerdo ku Inteligensia merikano, a keda bombardiá pa Israel na sèptèmber 2007.
Despues ku CIA a presentá ayera e “pruebanan” na miembronan di Kongreso, Kas Blanku a akusá Siria, i a bisa ku e pais aki mester aklará detayenan di su programa nuklear.
Den un komunikado, Gobièrnu merikano a afirmá ku na Siria e régimen respaldá pa terorismo, ta tuma desishonnan pa desestabilisá Lebanon, ta pèrmití entrada di kombatientenan estranhero na Irak, i ta reprimí su hendenan.
“Mester pone fin na esaki!”, Gobièrnu di Merka a bisa den e komunikado.
Di su banda, Direktor di OIEA, Mohamed ElBaradei, a señalá ku e akusashonnan di Merka lo bai keda tratá ku seriedat ku esaki ta meresé i lo investigá su verasidat.
Pero ElBaradei a kritiká e echo ku Merka i Israel no a informá nan promé riba eksistensia di supuesto instalashon nuklear.
Plutonio skondí
Siria na varios okashon a ripití ku hamas a desaroyá un programa di armanan nuklear, i no a konta ku kolaborashon di Nort Korea den e asuntu aki.
Pero Kas Blanku a afirmá ku e “operashon di enkubrimentu” ku Siria a realisá na e lugá kaminda tin e planta bombardiá ta demostrá ku e planta nuklear no a keda konstruí ku metanan pasífiko.
“Te 6 di sèptèmber 2007 e régimen sirio a konstruí un planta nuklear sekretu den un desierto na ost di e pais, kapas di produsí plutonio”, e komunikado a bisa.
Merka ta “seriamente” preokupá, “for di masha tempu”, pa e supuesto proliferashon nuklear sirio”, Kas Blanku a agregá.
Sin embargo, Embahador Al-Khiyami a insistí ku e akusashonnan no tin sentido.
“Si Siria ke tin armanan nuklear, e ora ei lo importá nan. Pero Siria sa ku esaki no ta kondusí na pas”, Al-Khiyami a indiká.
“Na lugá di saka pòtrèt di e sitionan aki, e merikanonan mester saka potrèt di e sitionan kaminda Israel ta warda su misilnan nuklear, ya ku e ta úniko potensia nuklear di e region”, E Embahador sirio a añadí.
Oportuno òf no oportuno?
Algun analista ta puntra pakiko Kas Blanku i CIA nèt awor ta bini ku e akusashonnan aki, na un momentu krusial den e esfuersonan pa konvensé Nort Korea pa bandoná su ambishonnan nuklear.
Nort Korea a akordá na febrüari 2007 pa kaba ku su armanan nuklear ku kambio di yudansa humanitario i pa retirá e pais for di lista pretu di “estadonan ku ta patrosiná terorismo”.
Tal akuerdo a keda aprobá entre Nort Korea i otro sinku nashon vinkulá ku e negosiashonnan: Merka, China, Hapon, Sur Korea i Rusia.
Merka a akusá Pyongyang di no ta kumpliendo ku e plaso pa hasi un deklarashon total di su programa nuklear, manera el a primintí.
Kas Blanku a insistí ku e ta komprometé ku kòmbersashon diplomátiko ku Nort Korea.

Foto: Planta nuklear di Siria 2504

E supuesto planta nuklear, despues ku Israel a bombardi’é na sèptèmber último.

Foto; Mohamed ElBaradei 2504

Direktor di OIEA, Mohamed ElBaradei.