WILLEMSTAD – Federashon di Otrabanda huntu ku Sosiedat di Komersiantenan di Otrabanda (SKO) for di ayera anochi a kuminsá ku jornada di aserkamentu ku instansia i personanan di e área di Otrabanda, pa yega na mobilisashon pa proyekto Rif. Un aserkamentu ku ta tumando lugá den sekreto ku e meta pa logra haña mas tantu koperashon pa sali na interes di e área i habitantenan di Otrabanda. Manera ta konosí ku e proyekto grupo Cayco ku diputado Anthony Godett ta purba di trèk, ta kousando sierto inkietut bou di organisashonnan di Otrabanda, meskos serka otronan ku ta sinti ku tin kosnan ku no a bai den bon direkshon.
Inkluso e siman, oposishon a yama un reunion públiko riba e materia aki, i ku sobrá di koalishon tambe no ta riba mesun liña ku e diputado. Segun informashon ku LA PRENSA a risibí ta indika ku tin un jornada di aserkamentu ku a kuminsá for di ayera, den kua organisashonnan manera Federashon di Otrabanda, SKO tambe ta forma parti huntu ku algun grupo di persona. Ta mobilisando pa mira si en bèrdat ta e loke ta deseo di habitantenan lo keda konstruí den e área aki.
For di un prinsipio den e kaso tambe ku Meta Corp, Federashon di Otrabanda a pidi pa no laga e área aki ta den man di un solo persona, pero pa e área aki keda desaroyá den un proyekto partisipativo.
Federashon di Otrabanda a mustra riba e Plan Mayó ku a keda presentá na gobièrnu añanan atras na diferente okashon i ku nan ta kere ku mester buska bienestar pa empresarionan por haña oportunidat pa hasi negoshi den e área aki. Plan Mayó na diferente okashon a keda presentá na diferente gobièrnu ku a primintí nan koperashon na e organisashonnan. Kada biaha ku kambio di gobièrnu e proseso ta keda impedí, di manera ku tempu a bai i awor tin otro desishon ku diputado Godett a tuma i ku ta buskando aprobashon di e BC pa duna derechi na un grupo pa desaroyá e área aki.
Por spera un mobilisashon spontáneo di gruponan ku ta aserkando otro, ku e meta pa mustra gobièrnu, ku no ta asina mester traha di komunidat, prinsipalmente den e asuntu di Rif, ku mester tene kuenta ku tin palabrashon den pasado ku apesar ku ta di otro gobièrnunan, ku mester keda atendé ku mas rèspèt.
Fuentenan yegá na LA PRENSA ta indiká, ku lo no bai sinta ketu i por spera pronto un akshon muchu mas fuerte dirigí riba e proyekto Cayco aki. Echo ku no a divulgá e grupo aki i ku simplemente ta komentario tin ta hasi ku no por konfia, konforme eksperensianan di pasado.
Opservadónan ta manifestá ku den pasado tabatin grupo ku a haña sierto tereno den e área aki, pero a resultá, ku nan kosnan no tabata kla i ku e parti di finansiamentu a hasi ku nan no por a konkluí nan plan. Esaki tabatin konsekuensia tambe riba intenshon di Andruw Jones ku e deseo pa desaroyá Stadion di Rif, ku a keda barí for di mesa, pa puro terkedat di e gobernantenan den pasado. E dianan benidero por spera mobilisashon di mas grupo di interes pa asina por anunsiá un apertura nobo den e kapítulo di proyekto Rif.