Prof. Dr. Lorito ta yama tur hende un felis djabièrnè. Ya kaba nos ta yegando otro fin di luna i nos lo pone 33 1/3 parti di 2008 nos tras. Kon a para di tur e bon deseonan pa 2008?
*********
Den e reunion di ayera riba SEI, tabatin un miembro ku tabata kontra (ku su derechi) ku a inventá yen di palabra nobo. Nos no sa ta kiko ta su intenshon, pero un kos ta sigur: e ta yenando vokabulario di papiamentu ku masha disparati! Papiando normal pa tur hende komprondé ta mas mihó! Korektamente Gimena a mustr’é riba e hecho, ku e ta trata di bon ku yen di palabra karu i inventá pa sigui impreshoná e hendenan bobo ku ta sigui su tras (esei ta palabranan di Gimena, no di Lorito).
*********
Gimena a bisa bon kla tambe, ku ora e kana bario, yen di hende ta pidi poko poko pa niun otro hende tende pa no laga e hendenan ei drenta den gobièrnu. Ke men di un banda e polítiko ta bisa, ku gobièrnu mester bai kas, pasobra den pueblo gobièrnu no ta bon mirá (mas) pero di otro banda e mesun pueblo ta bisa pa no laga oposishon drenta gobièrnu. Polítika ta un tutu!
*********
Nos a tuma nota tambe, ku diputado Willem a bisa Norbert bon kla ku si e ta kontra SEI ta kiko ta su alternativa anto? Realmente ora Lorito pèrdè su tempu skucha e reunionnan ta sali na kla ku tin hopi krítika, pero poko alternativa di parti di esnan ku ta kritiká. Nos ta kere ku polítika en general lo hasi su mes un fabor si ora e ta kritiká, e bisa mesora tambe kiko e lo hasi diferente!
*********
Pa loke ta trata SEI mes nos ta kere ku mester bin un splikashon un poko mas mihó di e konsepto pa pueblo. Nos a sugerí pa bin ku un nòmber krioyo (SEI-chi) i un logo òf hasta un maskota. Asina ta hasi un konsepto steril mas asesibel pa pueblo, pasobra finalmente ta pueblo ta bai benefisiá.
*********
Un kos Lorito no a komprondé di SEI-chi, ta di kon tantu sèn mester bai bèk den aparato di gobièrnu. Nos ta komprondé, ku mester eliminá burokrasia i red tape i mester promové efisiensia den gobièrnu pa duna mas impulso na ekonomia, pero na nos opinion esei ta mas bien un asuntu di mentalidat. Nos ta kere ku bo por hinka asina tantu sèn den e asuntunan aki, pero si no tin kambio di mentalidat ta mesun leu nos a keda.
*********
Lorito kier a manda palabranan di kondolensia pa Eduardo de Veer ku fayesimentu di su mama ayera. Nèt awor ku tin asina tantu skibimentu i zundramentu inhustu e kos aki ta pasa. Forsa na e famianan i pas na su alma!
*********
Parse ku e lidernan di koalishon a papia riba tur e kosnan ku bin dilanti últimamente. Nos tin entendí, ku Nini a zundra Meta i su hendenan i nunka el a papia ku nan. Kon bo por zundra i reklamá un hende na mal òrdu si nunka bo a papia kuné i tende di su plannan? Nos ta sigui insistí ku e kos aki no a keda bon i ta mandando un señal robes pa invershonista.
*********
Pa nos integridat ta tambe pa no pèrmití ku ta hasi kos deskabeyá i inhustu ku otronan. Unda integridat a keda awor aki? Nos ta keda te aki awe. Un felis djabièrnè i te mañan ku Dios su poder!