WILLEMSTAD - Hopi t’esnan ku lo rekordá e periodo di 1986-1999, durante kua e deporte di BMX (baiskelkros) a konosé tempunan glorioso aki na Kòrsou.
BMX ku ta para pa Bicycle Moto Cross, a inisiá den final di añanan ‘60 na California (Merka).
Den e temporada ei, e deporte di Motocross a bira popular na Merka.
E vershon motorisá a sirbi komo inspirashon pa kompetensia humano.
Muchanan i tiner ku e deseo, pero sin moda pa partisipá den Motocross, tabata deshogá nan energia dor di kore baiskel riba pista ku nan mes a traha.
E aventureronan aki a kompletá e imitashon dor di bisti unifòrm djesnan ku ta kore motor i asina e nòmber “BMX” a keda a establesé.
Kareda di BMX ta wòrdu tené riba pista di. ± 350 meter i ta inkluí salto, bògt i otro opstákulo.
Ocho koredó ta kompetí den kada manga (buèlta klasifikatorio, kuater final, semi final, final) i e promé kuaternan ta klasifiká pe siguiente buèlta.
E karedanan ta hopi eksitante i ta un deporte ku henter famia (hòmber i muhé) por praktiká, komo ku tin kategoria fo’i 5 aña te 50+.
BMX ta mas konosí na Merka, Oropa i Sur Amérika.
Ekiponan manera: Dynamite Racing Team, Silver Streak, Delta Force i Curaçao Racing Artists i nan integrantenan: Papito Perez, Urvin “Biew” Garmes, Grandly Perez, Rudolf “Lito” Garmes, Anthony de Jesus, Giancarlo (Django) Harel, Michael Jansen, Wenson “Fresh” Prince, Jaime Perestrelo, Lucien, Raimy Lauffer, Argenis “Huerta” Leitoe, Junny Bregita, Zahur Fraai, Rasid Winklaar, Regino “Papa” Tromp, e rumannan Javier “Sausage i Jairo Scharbaai i last but not least Andruw Jones, ta entre e hopinan ku tantu na Kòrsou komo den eksterior a gana numeroso premio representando nos pais.
Entre e premionan te ainda ta destaká, un di 5 lugá n’e XIV Kampionato Mundial BMX 1995 (klase eksperto 15 aña) na Colombia i Kampion Kampionato Sur-Amerikano BMX 1996 (klase eksperto 16 aña) na Ecuador, ámbos konkistá dor di Zahur Fraai.
Un kantidat grandi dje koredónan ku a bai studia na Ulanda a sigui praktiká BMX i ku hopi éksito.
Den esnan ku ta aktivo ainda, Junny Bregita i Zahur Fraai, ta preparando pa kompetí den e final dje Kampionato Oropeo BMX 2008, kua lo tuma lugá entre 1-4 mei 2008 na Weiterstadt, Alemania, representando Antia (Kòrsou).
Junny lo kore den klase “Challenge Cruiser 30-39”, miéntras Zahur lo figurá tantu den Challenge Men 25/29” komo “Cruiser 19/29”.
Teniendo na kuenta no solamente e eksperensia vasto ke dos koredónan aki ta pose’é di dje, sino tambe e nivel riba kua nan ta kore, no tin duda ku tur dos lo keda premiá.
Un palabra sinsero di éksito ta bai pa Junny i Zahur ke deseo ferviente pa un bia mas saka kara di Kòrsou.