WILLEMSTAD – “Promé ku gobièrnu tuma un desishon riba e petishon di UTS pa oumentá e tarifa pa konekshon fiho, UTS mester duna un mihó argumentashon pakiko e ke un oumento, pero partikularmente, pakiko un oumento asina haltu. E argumentunan presentá te ku awor, no ta sufisiente fuerte pa konvensé gobièrnu”.
Esei, di akuerdo ku minister di Telekomunikashon ingeniero Maurice Adriaens.
UTS a entregá un petishon resientemente na Gobièrnu Sentral (lesa: minister di Telekomunikashon ingeniero Maurice Adriaens) pa oumentá e tarifa ku e kompania ta kobrando pa telefon fiho di kas.
E montante aki, ku aktualmente ta 18 florin, lo subi te 38 florin, Paul de Geus a splika.
El a bisa mesora ku e kambio aki ta nesesario, mirando e situashon di kompetensia ku ta hopi fuerte awor aki riba merkado di telekomunikashon.
De Geus a bisa ku tur hende por kòrda ku ta for di tempu e kompania di telefon tabata den man di gobièrnu, e kompania nunka a adaptá su tarifa. Komo ehèmpel ku otronan si a dal bai ku oumento, el a menshoná St. Maarten kaminda e montante ta 45 florin pa abono fiho i na Ulanda kaminda e ta alrededor di 40 florin.
De Geus a bisa mesora, ku e oumento lo bai den dos fase: den promé instansia lo oumentá e tarifa te na 30 florin pa despues subi esaki te na mas o ménos 38 florin.
Minister Adriaens a bisa ku e tin komprenshon kompleto pa e argumento aki di UTS, ku nan tin komo 18 aña sin oumento di tarifa.
“Mi tambe ta kòrda ku ta masha hopi aña kaba ta manteniendo e 18 florin komo tarifa.
Mi ta konsiente tambe ku tur kos a subi. Gastunan operashonal di UTS a subi i tur kos ta birando dia pa dia mas karu. Pues, mi tin komprenshon pa e petishon pa oumento,” e mandatario a ripití.
Adriaens a bisa ku di otro banda, mester tene kuenta tambe kiko ta biba den komunidat.
For di momentu ku UTS a hasi e anunsio aki, a surgi un ola di preokupashon den komunidat. Ta hopi keho ta drenta diariamente ku e oumento ta hopi drástiko.
Fundashon pa Konsumidó a manda un karta pa gobièrnu den kua e ta pidi pa wak e asuntu di oumento aki bon, komo ku e ta afektá hopi hende den komunidat.
“Si tuma por ehèmpel e kategoria di nos grandinan, masha hopi no tin Internet. Bo por bisami ku bo ta subi tarifa aki banda i baha Internet ayabanda, pero pa e grandi, esaki no ta hasi niun diferensha. Pa esun ku no tin Internèt, ta e oumento so e ta sinti,” asina Rene Trinidad, direktor di Fundashon pa Konsumidó a bisa na e okashon ei.
Segun Adriaens, e oumento ta drástiko i UTS lo mester argumentá mihó pakiko e oumento aki. Ta ora gobièrnu risibí e argumentashon nobo aki, e ta tuma desishon, e mandatario a splika. Adriaens por sierto no a gusta e idea tampoko di relatá e oumento di tarifa pa abono fiho na e asuntu di Internèt.
Mi no ta kontentu ku e relashon aki. Mi ta preferá di weta kada unu riba nan kurpa, el a añadí.