WILLEMSTAD - Lider di MAN, Charles Cooper ta konsiderá, ku gobièrnu no mester sukumbí pa e preshon ku Ulanda ta poniendo riba Antia pa haña loke nan ke. Nos ta un pais den Reino ku mester ser tratá ku dignidat, e dirigente polítiko a deklará.
E deklarashon aki di Cooper ta relashoná ku e aktitut di partido VVD na Ulanda. Ulanda ta reprochando Antia ku el a manda pidi sierto informashon fiskal, pero ku te awe e no a risibí esaki.
Johan Remkes, eks minister pa e partido aki a bai asina leu ku el a formulá un moshon den kua e ta proponé ku tanten Antia no kumpli ku esaki, pa no manda niun depchi mas pa e islanan.
Mester bisa ku Remkes, ku ta bosero pa frakshon di VVD den Tweede Kamer pa tur loke ta regardá Antia, último tempu ta basta aktivo i konstantemente ta lansando krítika riba e islanan di Antia.
E posishon aki a kai masha malu aki na Kòrsou. Pa partido MAN, esaki ta nada mas ku chantahe.
“Komo oposishon nos tin nos diferensha di opinion fundamental ku gobièrnu riba e trayekto estatal ku e ta kanando. Pero gobièrnu por konta ku nos sosten pa rechasá e aktitut aki di Ulanda. Esta, si esei ta e posishon anto ku gobièrnu a tuma,” Cooper a bisa.
“Ta inaseptabel ku Ulanda ta kere ku e por bin pone preshon di e forma aki riba nos pa haña informashon ku de fakto ta informashon ku nos por konsiderá un kos interno di nos”, el a agregá.
Cooper a bisa, ku e no tin masha ilushon sinembargo ku e aktual gobièrnu lo para fuerte kontra e ulandesnan.
E chèns ta grandi ku gobièrnu ulandes lo pone preshon riba nan i nan lo sukumbí pa e preshon aki, Cooper a pronostiká.
El a bisa, ku ta bon pa keda establesé pa klaridat ku MAN lo no aseptá esaki i lo bringa esaki ku tur forsa, mas ainda pasobra Remkes no tin nada di bin bisa gobièrnu di nos pais.
Remkes ta un parlamentario ku mester atendé ku gobièrnu ulandes, el a bisa.
Diputado di Finansa Mike Willem a afirmá e último aki. Willem a bisa ku Kòrsou ta atendé ku gobièrnu ulandes. Si un parlamentario ke bisa algu, e mester hasi esei na direkshon di gobièrnu ulandes.
Willem, ku no kier a gasta muchu tempu na e asuntu aki, a bisa ku di akuerdo ku palabrashon ku tin entre Kòrsou i Ulanda pa loke ta e proseso di saneamentu di debe, Ulanda en bèrdat tin akseso na sierto informashon.
Pero nunka por ta asina, ku e informashon aki ta regardá asuntu di individuonan ku ta biba riba e islanan aki, Mike Willem, diputado di Finansa a agregá.