WILLEMSTAD - Proyektonan ku gobièrnu di Kòrsou ta ehekutando ta tene kuenta awendia ku tantu naturalesa komo e hende na pia. Esaki ta e filosofia moderno ku gobièrnu, atraves di su servisio DOW ta implementando den proyektonan ku e ta ehekutando último añanan.
Esei a bin dilanti durante entrega di e proyekto Caracasbaai ku a tuma lugá djaweps último. Entrega di e proyekto aki a konta ku asistensia di basta invitado.
Loke ta resaltá den e kaso aki, ta e manera ku a diseñá e proyekto, esta a base di un konsepto moderno. Si ripará bon, e kaminda no ta mes hanchu ku loke normalmente nos konosé. E kaminda ta mas smal, pero tòg sufisiente pa dos vehíkulo por pasa banda di otro. Pero si ántes por a kore pasa ku 60 kilometer, bo mester redusí velosidat, pa garantisá ku bo ta kore seif i responsabel. Pero si ta papiando di kaminda mas smal, ta papiando alabes di alsera ku ta mas hanchu.
Alsera mas hanchu, kombiná ku palu i mata kant’i kaminda, ku ta duna e hende na pia mas siguridat. Aparte pues di duna sombra, e ta nifiká tambe mas protekshon.
E lusnan moderno ku a instalá aki, ta duna e proyekto un dimenshon adishonal. Den dia i anochi ta hopi bunita den e área aki.
Esnan ku sa pasa aki banda den oranan di atardi, por a tuma nota di hendenan ta kana, hende ta djòg òf simplemente ta keiru riba e alseranan hanchu aki.
Pa gobièrnu di Kòrsou, e proyekto ta sirbi su meta perfektamente.
Un otro aspekto ku mester menshoná ta e forma ku ta atend’é awor ku e awa ku kai for di shelu. E pensamentu básiko ta, ku no por laga e awa ku kai, kore sin mas bai laman atrobe. E awa ku kai den e baki di mata, pokopoko ta filtra den piedra bai abou. Na momentu ku tera saturá, e awa ku ta di mas, ta pasa atraves di un pipa bai laman. E sistema aki, konosí tambe komo drenahe franses, ta nifiká ku bo ta usa e awa na un manera muchu mas efektivo.
Kisas hopi hende lo no para ketu na esei, pero no ta pòrnada ta konstruyendo alsera di klenku. Kontrali na asfalt, e klenku, tambe ta pèrmití awa filtra bai den tera. Un bentaha mas ta e hecho ku un alsera di klenku riba término largu ta sali mas barata.
Por los e klenkunan, hasi kualke trabou bou di tera i pone e mesun klenkunan bèk, algu ku bo no por hasi ku asfalt.