WILLEMSTAD – Awe tardi 5or, na altura di Marchena Hardware lo tin un manifestashon den e bario Wishi/Marchena pa rekòrdá e hecho ku awe, 26 di aprel ta nèt 30 aña pasá ku a surgi un disturbio violento den e bario ku a kosta bida di un siudadano.
“Nos ke pone énfasis riba e hecho ku loke a sosodé, hamas tin mag di pasa atrobe”, asina Kenneth Valpoort, presidente di Fundashon Wishi i Marchena a deklará.
Dia 26 di aprel 1978 a surgi un disturbio den kua un kantidat di hóben tabata enbolbí. Reportadamente ta trata aki di un grupo di hóben ku tabata protestá kontra abusu. Valpoort a bisa ku polis a kuminsá usa forsa brutu kontra e hóbennan, kendenan un dado momentu a kuminsá tira kos riba kaya. Tabata nesesario pa sera kaya durante 3 ora. Polis sinembargo a bin bèk mas fuerte armá despues na e sitio, i dado momentu a surgi un tiramentu. Tiru a alkansá un hòmber den su outo mortalmente.
Segun Kenneth Valpoort, e fecha di 26 di aprel a bira un fecha históriko. Algu a sosodé e dia ei, ku nos en todo kaso no ke pa pasa atrobe.
E manifestashon di awe tardi lo kulminá ku desvelo di un monumento pa e víktima ku a kai 30 aña pasá.
Kenneth Valpoort a bisa ku e fecha di awe lo keda un fecha memorabel. E no ta kere ku e situashon di 30 aña pasa lo por ripití, pero tampoko ta ekskluí esei kompletamente.
“Loke si nos por siña komo un lès for di e kos aki ta, ku ounke polis tin derechi di aktua, mester rashonalista i aktuashon di polis mester evitá provokashon,” el a bisa.
E bosero di e Organisashon di Wishi i Marchena a indiká ku polis tin derecho di hasi su trabou i ku e Komishon ta apoyá i sostené e trabou aki esaki. “Pero mester e adaptá e forma kon polis ta atendé ku e hóbennan den Marchena, pa evitá ku ta surgi provokashon”. Valpoort a sigui bisa ku den mayoria kaso ta surgi provokashon di parti di polisnan na momentu ku, nan ta aktua kontra di un òf ke otro situashon.
E Komishon di habitantenan di Wishi i Marchena ta hasi un apelashon na e outoridatnan pa redusí e provokashon den e bario. “Nos ta kompletamente di akuerdo ku tin e kòntròl, pero nos ta pidi tambe pa evitá provokashon i tambe e menasa ku e habitantenan ta haña komo konsekuensha di ekspreshonnan di e polisnan”, tabata palabranan di Kenneth Valpoort.
Di su parti Komishon Wishi i Marchena ta purba pa mustra e hóbennan riba e hecho ku nan ekspreshonnan mester ta mas moderá. Esaki tambe ta un manera pa evitá provokashon, segun Valpoort. “Kompará ku trinta aña pasá, nos tin otro tipo di hóben, i nos deber ta pa informá nan riba e susesonan di trinta aña pasá, pa evitá ku mesun fayonan ta wòrdu kometé”.
Huntu e konmemorashon aki, lo hasi uso di e okashon pa tene un manifestashon kontra polushon di Refineria Isla.
Fundashon Kuido Humano, SMOC i otronan lo tei presente i ku tur probabilidat lo hiba palabra tambe na e okashon aki.