AMSTERDAM/ WILLEMSTAD - E organisashon Hells Angels ta preparando kasonan mionario kontra estado ulandes pa e forma ku a trata miembronan di e organisashon aki durante último añanan.
Nan a tuma e desishon aki, awor ku Ministerio Públiko a disidí ku e ta stòp ku persiguishon kontra Hells Angels.
Segun mr. Abram Moszkowicz, abogado di vise presidente di Hells Angels Harry Stoeltie, su kliente so por entregá un kleim kontra estado “di riba un mion euro”.
E abogadonan di e otro miembronan di Hells Angels a anunsiá ku nan ta deliberando kon haltu e kleim kontra estado lo bira.
Abogado mr. Marnix van der Werf, kende ta defendé Daniel Unneputty, presidente di e organisashon, a bisa ku a pinta su kliente komo lider di un kantidat di kriminal pisá.
Ministerio Públiko a disidí e siman aki ku e no ta apelá e kasonan mas.
Di un banda t’asina ku Ministerio Públiko a bin ta pèrdè kaso tras di kaso ku e tabatin den korte, pa prohibí eksistensia di Hells Angels na diferente siudat di Ulanda.
Ministerio Públiko ta sostené ku e Hells Angels ta un organisashon ku un base kriminal, ku ta kulpabel na asesinato i maltrato i ku ta dediká su mes na trafikashon di arma, droga, estafa, menasa i ekstorshon. Pero ta akusashonnan riba papel pasobra kada biaha korte a konkluí ku no por a proba konvinsentemente ku Hells Angels en bèrdat ta un organisashon kriminal manera OM ta insistí.
Ta bin aserka, ku korte a disidí ku hustisia a pèrdè su derechi di persiguishon. Aparentemente a deskubrí diferente relato di kombersashon entre miembronan di Hells Angels i nan abogado ku nan a tap ilegalmente. Korte a indiká ku nan a kometé un piká mortal ku esaki, pasobra e tipo di informashon aki mester keda konfidensial.
Aparentemente e investigadornan aki tabatin akseso durante un periodo hopi largu na e informashon aki.
Segun abogado Moszkowicz, e daño ku vise presidente di Hells Angels Harry Stoeltie a sufri, un kos enorme.
El a splika ku Stoeltie a pèrdè su trabou. E tabata hefe di siguridat na e sentro nokturno Yab Yum ku un salario basta reimu. El a pèrdè esei, banda di e hecho ku bankonan a kibra tur kontakto kuné i partnernan di negoshi a hala bèk.