Prof. dr. Lorito ta yama tur hende un felis djasabra. Masha ambiente a kuminsá forma tur kaminda, pasobra tin hopi hende a tuma liber otro siman. Awor ku minister a duna liber (ku rason òf no) djabièrnè otro siman, hopi hende a konopá un dia siman liber.
****
Lorito a pensa masha den e dianan aki riba Siegfried Rigaud (q.e.p.d) ku semper tabata usa e dicho: Mas brisa mas goddem. Tin hende ta kere ku nan por spanta balente. Nos ta konsehá wak nan kaya masha bon. Ora bo hasi sierto kosnan bo no por kere ku bo ta “get away” kuné tur ora. Ya kaba bo a hasi yen di kos ku a keda ketu pa bo pero e biaha aki prepará pa un bataya duru. A buen entendedor!
****
Gobièrnu a hasi masha bon di duna tur informashon riba e situashon na Dòk. Warda mas tantu lo tabata iresponsabel komo ku ta trata di un situashon masha serio. Asina mester ta: bo mester ta proaktivo i transparente, pasobra di tur manera medionan lo a haña sa tòg.
****
Nos a haña basta reklamo ayera di hendenan ku a bisa nos, ku miéntras ku diputado Eugène tabata papia riba e situashon na Dòk, un kolega di dje tabata sinta hunga ku un telefon. Nan a pidi nos pa bisa ku e kos ei a keda masha malu. Lorito mester bisa ku nos mes no a wak e asuntu aki masha bon.
****
Den e dianan aki nos a repasá korantnan di algun dia pasá i nos a kai riba un komentario ku un komersiante prominente ulandes a hasi den sentido ku e ta kere ku Ulanda mester konfrontá un desaster pa kosnan kambia. Nos a haña su remarkenan masha notabel. E ta argumentá ku un desaster mester ta dje serio ei pa algun dia ku niun hende no por sali for di nan kas. E ta referí na e káos ku tin den tráfiko na Ulanda ku no ta hañando e atenshon nesesario. Segun e empresario aki ta solamente ora tin un desaster posiblemente e tema lo haña atenshon. Su komentario a pone nos kòrda masha diferente desaroyo aki ku tin biaha ta kana mesun kos: ora nan bira problema serio, ta kore bai atendé nan!
****
Mira kuantu dia nos ta papiando di e asuntu di krísis di kuminda. Awor ta Brazil a stòp eksportashon di aros, siguiendo ehèmpel di otro paisnan. Nos ta sigui kore tras di e hechonan i nos no kier tende. Ora ku e krísis aki bata por kompleto na nos porta (e promé señalnan t’ei kaba) e ora numa nos kier kore atendé e situashon. Ojo shonnan!
****
Minister Elvis ta tratando di defendé su desishon pa duna liber dia 2 di mei awor. E no a gusta e komentarionan di VBC. Nos a tene un enkuesta i 99 porshento a bisa ku nan ta di akuerdo ku e minister a duna liber. E problema ta ku nos ta un isla ku ta gusta dianan liber! Lorito no ta kere ku tin problema pa duna liber, pero ora ta dia di traha mester traha i produsí tambe!
****
Nos kier a kòrda riba e proyekto di e Mihónan di Tur Tempu ku e aña aki ta pinta di bira fenomenal atrobe. E aña aki Mi95 ZFM lo presentá 150 ora di e kansionnan di ántes. Lorito a komprondé ku tin algun number grandi tambe ku a asosiá ku e proyekto e aña aki loke ta duna e proyekto un realse spesial. Ademas ta 75 aña di CUROM loke tambe ta hunga un ròl.
****
Lorito lo bai tira un tèk aya banda pa wak kon e ambiente lo ta. Lorito gusta músika di ántes masha tantu mes i nos lo bula bin konta boso ta kiko ta kiko. Te djaluna awor ku Dios su poder!