WILLEMSTAD – “Mi no ta ekskluí ku na 2001 lo por tabatin un karta pa pidi un investigashon i ku talbes e karta aki tabata unu ku kopia mandá pa e minister”, tabata deklarashon di Carel de Haseth den investigashon ku LA PRENSA ta hasiendo. For di ayera nochi LA PRENSA a kuminsá ku investigashonnan rondó di Freewinds, ya ku den pasado a desmentí informashonnan ku riba e barku aki tin asbèst. Sigur na dos okashon nòmber di Freewinds a kai di e asuntu di asbèst i ku a desmentí esaki kategórikamente. Den un edishon di 2 aprel 2001 tabatin un relato di un investigashon ku un ulandes ta pidi na outoridatnan inkluso sekretario di Estado Gijs de Vries riba e barku Freewinds.
E ulandes aki ta duna di konosé den su karta, ku riba Freewinds tin asbèst i ku ta pidi outoridatnan tene kuenta ku esaki i buska medidanan pa evitá pa e barku no mara den haf di Kòrsou. En bèrdat nada no a bin afó di investigashon aki, ya ku a menshoná di “Blauwe asbest’ ku ta unu sumamente peligroso. E ta bira peligroso na momentu ku un persona mishi ku esaki. Debí ku e nòmber di eks minister Plenipotensiario ta keda menshoná den e artíkulo, a buska kontakto ku Carel de Haseth, kende a splika ku no ta kòrda ku tin un karta ku a keda dirigí na su persona, pero ta afirmá, ku talbes e karta aki ta un kopia, mester a keda mandá di manera pa pone na altura. Di otro banda De Haseth ta mustra ku e no ta e persona responsabel pa e materia aki, pero ta konfirmá ku ora ta trata di asbèst, semper esaki a hala su atenshon.
Den su añanan di estudio tabata usa esaki pa angua ku sierto téknikanan, pero ku no ku awe en bèrdat esaki lo por lanta sierto preguntanan tokante uso di asbèst. Di otro banda Carel de Haseth ta manifestá, ku tabatin diskushonnan riba e materia aki entre su persona ku eks minister Stanley Inderson i tambe despues di e barku ku tabatin asbèst ku tabatin e studiantenan di Feffik riba dje. E diskushonnan aki tabata otro, pero riba e asuntu di Freewinds, De Haseth no ta kòrda ku tabatin un karta dirigí na su persona.
Carel de Haseth ta duna di konosé, ku si tabatin un karta for di e tempu ei, e karta aki mester a keda mandá pa esnan responsabel pa investigashon por a sigui tuma lugá. Miéntras tantu LA PRENSA lo sigui ku su investigashon, ya ku tin kopianan di edishonnan den kua lo bai aserká tur esnan enbolbí for di 2001 pa nan vershon.