WILLEMSTAD – Servisio di Medio Ambiente, Inspekshon di seguridat di Haf i Inspekshon Marítimo di Antia ulandes a investigá na aña 2001 un keho di asbèst riba e barku Freewinds. E investigashon tabata konsekuensia di un keho ku un siudadano ulandes a entregá e tempu ei na sekretario di Estado Gijs de Vries i minister Plenipotensiario na Den Haag, Carel de Haseth.
Den e keho ofisial Gerard de Rooij a atvertí pa peliger a bordo di Freewinds ku regularmente sa bishitá nos isla. De Rooij a referí na un investigashon di un eksperto merikano Lawrence Woodcraft ku durante un bishita a detektá ‘blauwe asbest’ a bordo di e barku ku ta pertenesé na Majestic Cruise Lines di The Church of Scientology. No opstante e konosementu akí e notisia di ayera, ku riba e barku G.G.D. a detektá asbèst, a kai manera un baño di awa friu riba diferente hende. Ku urgensia a pone un konferensha di prensa pa evitá ku den fin di siman e notisia lo a plama i kousa pániko.
Durante e konferensha di prensa ayera nochi a sali na kla, ku ta for di tres siman pasá a detektá e supstansia paresido na asbèst. A manda esaki Ulanda pa investigashon i e resultado di e investigashon a indiká ku ta trata di asbèst. Sin embargo e kapitan di e barku no tabata di akuerdo ku e resultadonan di e investigashon. No opstante esaki gobièrnu a disidí tòg ku ta informá komunidat di e situashon, despues ku ayera gobièrnu ofisialmente a risibí e notisia. Pa evitá ku e notisia lo a plama den fin di siman, a opta pa tene e konferensha di prensa mes ora.
Asbèst blou ta segun ekspertonan peligroso na momentu ku hasi reparashon na e material i esaki produsí polvo. E ta kanseroso i ta forma peliger pa salubridat públiko ora inhalá e polvo ku ta kontené partinan di e material. Na 2001, den un entrevista ku LA PRENSA, Quirino Richardson di Servisio di medio Ambiente tabata na altura di e keho ku via di kanalnan gubernamental a yega na su ofisina. E tempu ei el a bisa; "Nos ta investigando e keho i tin atenshon pa e problema. Nos ta wardando riba e promé yegada atrobe di Freewinds pa nos hasi nos investigashon pa mira si tin peliger bèrdat pa salubridat públiko".
Di parti di Inspekshon Marítimo e tempu ei, nan a mira problema pa atendé ku Freewinds spesífikamente. Inspekshon Marítimo a splika na e okashon ei ku Freewinds ta un barku trahá na aña 1968, i ku tur edifisio i barku trahá promé ku 1970 ta trahá ku asbèst. Nan a splika tambe ku ta un material di isolashon ku ta protehá bon kontra kandela. Nan a asta bisa kon ta kuminsá nenga entrada di Freewinds, si nos sa ku tur barku promé ku 1970 ta trahá ku material ku ta kontené asbèst. Na e okashon ei nan a bisa ku ta mayoria barku tin ku ninga entrada e ora ei. Konsekuentemente no a tuma niun medida.
Ekspertonan a splika ku asbèst blou no ta peligroso tanten ku no mishi ku e material. Den e kaso di Freewinds a mishi ku e material ora tabata kita esaki for di interior di e barku. Tin indikashon ku e área tabata ventilá, loke ta nifiká ku partinan di e material a sali for di e barku i drenta den aire.