Mensahe di fraccion di RED na ocasion di Dia di Obrero

ORANJESTAD- Dia di la Reina y Dia di Obrero ta dilanti porta y pueblo lo tin un long weekend cu ta cuminza for di diaranzon y ta apropia pa nos para un rato keto pa pensa riba nos futuro. Nos a caba di celebra Dia di Tera y loke ta resalta ta e hecho cu Aruba a bai for di balanza, a sacrifica nos naturaleza pa beneficio di desaroyo economico.

Mescos ta conta tambe pa e clase trahador, a desaroya Aruba pero e trahador a bai atras.

Prome cu Status Aparte un cas cu dos salario minimo por a biba hopi bon y tabata hopi mas cu loke tabata e canasta basico. Ke men e por hasta biaha cu vakantie pasobra e tabata sobra placa despues di cumpli cu su debernan.

Na e momento aki cu dos salario minimo den cas e trahador no ta alcanza e canasta basico, esaki ya na 2005. Corda awor na 2008 cu a bin aserca e desaster di e BBO cumulativo, hunto cu e subida drastico di prijs di petroleo y di comestibles.

E desigualdad social ta birando cada dia mas grandi. Nos ta mira hotelnan y edificionan luhoso, shopping malls di luho extremo, restaurantnan di luho. Di otro banda e trahador ta sinti den su cartera cu e ta bai atras, cu e luho ey fo cada bez ta bira mas inalcanzabel pe. Hasta lo minimo pa por existi dignamente ta birando dificil pa e trahador. Gasolin, cuminda, awa, coriente, telefon, cable, hypotheek di cas, debe di auto, tur ta birando un peso insoportabel pa e trahador. Na fin di luna e no sa con pa saca su cuenta.

Pesei e trahador publico a lanta para y a hiba un lucha fuerte pa recupera algo di su capacidad di compra cu a bai perdi.

E trahador publico tabata decidido y su perseverancia a pone Gabinete Oduber IV dobla y sinta na mesa. E lucha di e Sindicatonan den Accion ta bai den historia di e clase trahador coomo un di e luchanan grandi. Pesei fraccion di RED ta felicita Sindicatonan den Accion y su vocero Magali Brito.

Na mesun momento fraccion di RED ta condena e actitud criminal di Gabinete Oduber IV di kita den un solo shot for di salario di e trahador publico e dianan cu e trahador a eherce su derecho di welga. Gobierno sa cu e salario di e trahador casi no ta jega mas pa cumpli cu su obligacionnan y a sabiendas toch bo ta laga kita mil florin of mas di e salario mensual. Wel no tin otro nomber cu bisa cu e actitud di Gabinete Oduber ta criminal. Director di Departamento a haya ordo di ariba pa tilda e trahadornan publico den accion di a comete ‘plichtsverzuim’ y ta menaza di tuma medida disciplinario.

Fraccion di RED lo defende tambe e clase trahador en general contra e medidanan cu gobierno kier impone pa loke ta AZV. Gremionan comercial y gobierno ta trahando hunto pa convence e clase trahador pa acpeta un pakete di medida unda e trahador mester paga mas y haya menos di cuido medico.

Bao di e condicionnan aki un peso mas riba lomba di e clase trahador ta inaceptabel pa fraccion di RED.

Score: 6.0, Votes: 1