Copa pa grupo Rosea Cultural, premio di estimilo pa Alexander Rober y Shanayah Howell

ORANJESTAD- E ganadornan di Copa Hubenil Gobernador Felipe B. Tromp pa aña 2008 ta conoci. Grupo cultural artistisco “Rosea Cultural” cu alumnonan di enseñansa special di Scol Paso pa Futuro a bira ganador di e Copa y e premionan di estimulo a bai pa e atleta Alexander Robert y Shanayah Howell. Tur e ganadornan lo ricibi nan premio diarason 30 di april for di Gobernador Fredis Refunjol durante un ceremonia den Parke Wilhelmina.
Rosea Cultural
Grupo Rosea Cultural a keda funda na 1996 y ta bou direccion di Madelene Kelly, maestra na Scol Paso pa Futuro kende ta dedica su mes na yuda e hobennan cu problema pa intregra den enseñansa regular. E hobennan ta haya formacion special ariba tereno di arte y baile y asina desaroya nan habilidadnan. Otro aspecto importante ta cu nan ta siña trata otro, respeta otro, carga responsabilidad, aumenta nan autoestima y crea un amor special pa nos propio cultura na prome luga.
Alexander Robert
Alexander Robert ta un atleta di 17 aña cu ta practica e deporte di triathlon, esta coremento na pia, core bicicleta y landamento. Durante aña 2007 el a logra diferente premio tanto local como den exterior.
Shanayah Howell
E hobencita aki no ta desconoci pa su logronan tanto na Aruba como den exterior pa e deporte di bmx cu e ta practica. For di su edad di dos aña e ta gusta core bicicleta. Actualmente e tin nuebe aña y ta campeon di Aruba den su categoria y na Estados Unidos e ta number uno tambe den cu categoria, esta “girls 9 years”. Pa dos aña consecutivo e ta campeon mundial den e deporte di BMX.
Entregamento di premio
E ganadornan lo ricibi nan premio diarason awor, 30 di april, Aña di La Reina for di Gobernador Fredis Refunjol durante un ceremonia den Parke Wilhelmina cu lo cuminsa pa 9 or y mei di mainta. E ceremonia ta cuminsa ora cu Gobernador inspecciona e guardia di honor forma pa miembronan di Cuerpo di Marina Real y presentacion di un saludo na gruponan hubenil uniforma. Despues lo presenta e himnonan di Hulanda y Aruba y lo tuma luga tambe hisamento di e respectivo banderanan. Presidente di Parlamento lo tene un discurso den cual e ta expresa palabranan di felicitacion relaciona cu celebracion di Aña di La Reina. Despues di un discurso di Gobernador lo bai over na entregamento di e premionan. E programa oficial ta termina cu un defile di e gruponan hubenil uniforma saliendo for di e sitio di parkeo patras di Cinema direccion pa Julianaschool. Un y tur ta invita pa presencia e ceremonia y pa duna apoyo y estimulo na e ganadornan y pa encurasha otro gruponan hubenil y hobennan individual pa sigui traha pa logra metanan grandi sea ariba tereno social, cultural of deportivo.