WILLEMSTAD – Un biaha mas asbèst ta pone nos na kareda. Despues ku anteriormente tabatin insidentenan ku asbèst na un skol den Saliña Abou, un otro skol den Otrobanda i riba e barku Seamaster, un biaha mas tin un insidente ku asbèst riba un barku. Informashonnan ku LA PRENSA a optené ta indiká ku na Kòrsou nos no tin un maneho di asbèst.
LA PRENSA a kombersá ku un eksperto den salubridat i el a bisa ku falta di un maneho ta pone nos na kareda kada bia di nobo. E eksperto a splika ku e departamentu kaminda e ta traha, ta atendé ku personanan ku posiblemente ta afektá ku asbèst. El a splika ku nan tarea ta kuminsá semper despues di e insidente. Loke si nan a hasi den pasado ta, konsehá GGD pa tuma estado di salú di hendenan ku tabata den kontakto ku asbèst i sigui nan durante un periodo di 10 aña. Di e manera akí por haña sa si e kontakto ku asbèst tabatin efekto negativo. Finalmente el a splika ku loke su departamentu sa di asbèst, ta saká for di literatura. Pero pa loke ta trata kasonan spesífiko di asbèst i hendenan ku a muri, no tin ningun dato.
Entretantu na Ulanda e sindikato pa trahadónan, FNV, ta boga pa un registro di asbèst. Esaki FNV ta bisa awe 28 di aprel ku ta ‘Workers Memorial Day’. FNV ta rekòrdá awe tur empleado rònt mundu ku a muri dor di nan trabou. Segun FNV mester bin ku un registro kaminda tur hende ku pregunta tokante e material mortal akí por akudí. Ulanda ya kaba tin e ‘Instituut Asbestslachtoffers’ (IAS) i lo ta bon pa inkorporá e registro di asbèst den e instituto akí, segun FNV. Partnernan sosial, aseguradonan i Gobièrnu ta karga IAS, pero ta intermediá solamente ora ta trata di un kleim di hende ku ‘mesothelioom’ òf famianan di e defuntu.