Skina di Sorti, awe djaluna 28 di aprel di 2008, ta kuminsá ku deseá un i tur un bon dia. Prensa ta un poder grandi denter di e sistema di gobernashon demokrátiko. E poder ta derivá for di lei (libertat di ekspreshon) i ta haña kontenido den e kapasidat di e respektivo medio pa gana i mantené interes di gruponan den komunidat. Un medio ku no ta generá entrada simplemente no tin kontinuidat.
****
Pa mantené gara den komunidat, sierto grado di populismo ta inevitabel. E populismo por reflehá su mes den e manera ku ta presentá e informashon (entre otro e “opmaak”), pero aki ta bon pa opservá ku e tono di e presentashon mester keda reflehá e konteksto emoshonal di e informashon.
****
Diferente medio ta faya na trese informashon den su konteksto korekto dor di laga estilo dominá riba e balansa ku mester tin entre kontenido i konteksto emoshonal. Otro ta laga opinion di e medio òf periodista dominá riba e informashon ku ta wòrdu presentá. Pa mantené integridat i tòg mantené e gara ku e otro aspektonan hopi medio, rònt mundu, tin diverso kolumna di tendensia sumamente populista. Sarkasmo, chasko, karikatura i chisme bo ta topa den e medionan di mas prestigioso.
****
Korektamente, Lorito ta alerta lektornan, ku si o no ta apresiá e tono sarkástiko, ku chasko i poko di chisme, bo no mester lesa e kolumna. E kolumna su meta ta hustamente e diferensia ku e relatonan klíniko di echonan. Den Skina bo no tin di buska relato di echonan, ni tampoko chisme. Den Skina e propósito ta di poko mas profundidat den ékis insidente, suseso òf desaroyo.
****
Pues apesar ku base di un medio responsabel ta “waarheidsvinding”, ku ta buska i trese echos veras, realidat di bida ta eksigí e otro aspektonan. Kontinuidat di un medio no ta dependé di únikamente e grado di konfiansa ku e ta generá. Integridat di un medio ta mara na e konsistensha den e trabou desplegá kaminda afekshon, ni kerensia, òf otro aspekto personal no ta influensia e trabou periodístiko.
****
Ku den Lorito i Skina di Sorti e tono ta basta skèrpi últimamente, ta refleho di e situashon di pais. Ta refleho di un desgusto ku ta biba den komunidat pa e “laksheid” den seno polítiko riba “feedback” for di komunidat riba e “geklungel” ku tin tantu den seno di gobernashon komo den e akshonamentu di oposishon.
****
Den nos komunidat, desgrasiadamente tin demasiado hende den puestonan di importansia pa funshonamentu di komunidat, ku no ke komprondé, ku pa nan no ta den un lus ménos envidiabel, nan mester midi nan akshonnan ku mas prudensia. Prensa no ta wòrdu suponé di kuida interes di aktornan den un komunidat. E tin di raportá lokual e ta konsiderá relevante i signifikante den kuadro di “waarheidsvinding” i su interes komersial (mantené gara).
****
Pa loke ta konserní Skina di Sorti, mi ke pone aserka, ku mi ta hasi opservashon krítiko riba esnan ku mi ta kere por i mester hasi mihó. Esnan ku mi ta konsiderá kaso pèrdí, mi no ta desperdisiá mi tempu kuné. Mi ta warda e proseso elektoral yega pa yuda sefta nan pafó di e sistema.
****
Mi tin intenshon di trese un apresiashon di e respektivo partidonan polítiko di Kòrsou den kurso di mei. Ta na e respektivo organisashonnan pa wak kiko nan ta hasi ku e informashon. Kon e respektivo organisashonnan òf nan fanatikada lo reakshoná, no ta relevante ni signifikante. Mi ta apliká e metodologia ku mi a desaroyá. Mi ta duna punto pa e respektivo avanse den e posishon ante e gruponan relevante den e kuadro polítiko.
****
Skina di Sorti ta ripití, ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.