I e plan maestro ta sigui funshoná
Na tinu bo no por tuma ni un di e aktual aktornan den maneho di papiamentu na skol na serio siguiendo e desishonnan ku a keda tumá den último añanan ku ta resultá den e intenshon pa bai bèk ku ulandes komo idioma di instrukshon den skolnan básiko.
No tabatin motibu pa reinventá wil. Pa duna lès den un idioma mester di material. Lógiko tòg? Mester tin hendenan adekuá i motivá pa duna lès. Lógiko tòg? Mester tin kliente/mayornan konsiente ku sa kiko ta pasando. Lógiko tòg?

Si e lógika no ta lógiko, anto e ora ei tabatin i tin te ainda un plan maestro ku tur tempu a pone ku ta solamente 10% so di muchanan den nos sistema di enseñansa ta logra drenta enseñansa sekundario di mas haltu. I di nan ta 3% so ta bai sigui studia i di eseinan kasi mitar nunka mas ta bin bèk Kòrsou. Mester tin un plan maestro ku a sòru pa esei i ku ta mantené e konfushon ku ta pone ku nos sistema di enseñansa nunka a duna e resultado ku e por i mester a duna. Ta un bèrgwensa ku awe ta diskutí riba bai bèk.
No a duna e sistema nobo oportunidat pa prueba su mes. Kiko a pasa ku e ingredientenan nesesario pa e mucha: material di skol na papiamentu, maestronan adekuá i motivá i mayornan konsiente? Den tur situashon ora algu no ta bai bon ta buska un salbashon; ta tira un salba bida. Kon bin ku esei no a sosodé (ainda) realmente direktamente i konkretamente pa e mucha ku lo benefisiá di inisiá su formashon den su idioma materno?
No ta tur hende por siña pa bira doktor. Pero tur hende tin un òf mas abilidat ku ta deber di nos sistema di enseñansa pa saka e vokashonnan individual. Ni esei no ta sosodé. E mucha ku ta traha bon ku su man, ku por a bira karpinté òf mètsla, awendia obligatoriamente mester siña atministrasi. Un ta pa malu?

Esun ku ta lesa i ku a tuma tempu un momentu den su bida pa sa di unda nos ta bin ta komprondé ku e konfushon ku tin awe den nos enseñansa ta produkto direkto di nos historia. I esun ku no hasi uso di konosementu disponibel pa tur hende awendia ta kulpabel ku nada no ta kambia.
Mayornan bon mirá ta esnan ku mester karga responsabilidat kompleto pa edukashon di nan yu. No por laga esaki den man di niun otro hende si bo wak ku bo futuro generashonnan ta dependé di formashon ku bo yu haña awe. I mayornan mansu ta responsabel i ta esnan ku ta pèrmití esnan ku na e momentu aki ta hasi i deshasí ku formashon di bo yu; sigui hasi loke no ta benefisiá i mucha ku su idioma materno ta papiamentu.

Skol no por siña bo yu loke abo mes no por. Skol por struktur’é si na skol tin material korekto i maestronan adekuá i motivá. Tur mayor ku stima nan yu i ku ke nan yu bon mes por yuda e yu pa e haña smak di siña, motivashon pa buska pa haña sa mas i ambishon pa logra mas. Esei definitivamente no ta algu ku ta sali di skol, pero di kas.
I mayornan ta esnan ku mester ninga ku ta yena nan ku duda riba si e loke tin ta bon. I kua skol por tin mihó nivel ku otro. I ken si por haña ‘bon’ skol i ken no.
Mayornan konsiente i na tinu mester disidí individualmente pa despues huntu ku otro mayornan konsiente ku nan mes ta bai tuma desishon pa nan yu haña bon skol lagando e mayornan ku ta skohe pa partisipá den e konfushon pa nan kuenta.
Nos leinan ta duna espasio pa mayornan konsiente i ku hopi kurashi i pasenshi tuma responsabilidat di enseñansa pa nan yu den nan mes man. I no tin niun hende ni instansia ku lo por stroba esei.



E konfushon kreá awe atrobe ku ta resultá ku ta pèrmití pa sigui laga e idioma ku no ta idioma materno, ta idioma básiko di instrukshon, ta bòftá den kara di mayornan ku aspirashon pa un dia nan yu bira algu den komunidat. E mayor ku asept’é no ke su yu bon.
I turesten e plan maestro di tur tempu pa tene mayoria mucha di Kòrsou (ku ta esnan ku tin papiamentu komo idioma materno) bobo, kèns i atrasá, ta sigui funshoná.

Bon siman.

Por komuniká ku Reyna Joe na who@whoiswho.an.