WILLEMSTAD- Den kuadro di selebrashon di 50 aña di Diósesis di Willemstad, LA PRENSA ke aportá pa tin mas informashon riba e selebrashon históriko aki. Den un relato kompilá pa pader Morrison La Porte ta presentá lo siguiente:
Obispunan di Iglesia ta duna na nos pa medio di Kristu pa aktua komo wardadó pa nos. Obispunan ta na enkargo di un “Diósesis /obispado” kual normalmente ta un teritorio geográfiko ku ta konsistí di diferente komunidatnan (parokianan) di fielnan. E Obispu ta e superior di tur saserdote (eksepto esnan ku ta pertenesé na un komunidat religioso) den su obispado, e ta tambe e lider spiritual di tur fielnan den su obispado.
Den un arsobispado, e obispu ta risibí un rango honorabel komo arsobispu. E manera usual pa dirigí bo mes ku rèspèt na un arsobispu ta ‘ekselensia’ ( na Ingles ta your grace) i e manera pa dirigí bo mes na un obispu ta: ‘monseigneur’.
Den nos Iglesia moderno no ta tur obispu ta okupá un posishon pastoral komo kabes di un obispado. Tin obispadonan ku ta asina grandi por ehèmpel, ku ta mas mihó nominá òf ordená obispunan pa tuma sierto parti di e obispado den kolegialidat ku esun enkargá, en bes di dividí e obispado. Pues tin hopi obispu ku ta representante Papal, nan ta yama nan diplomátikonan Papal (nunsio). Den área di Karibe nos tin un representante Papal den Karibe ku ta biba na e Nunsiature na Trinidad. Tin hopi Diósesis/Obispado ku tin obispunan ousiliar, pa yuda e obispu enkargá ku e obispado loke nos ta yama e ordinario lokal.
Obispunan semper ta keda skohé i apuntá pa nos Papa. Ounke ku mi mester bisa ku den e oriental e obispu ta keda elegí i apuntá dor di e sinodo (enkuentro) di obispunan i despues e ta keda ratifiká pa Papa. E proseso normal ta, ku e representante di nos papa den e diferente region ta ofresé nòmbernan di tres kandidato i ta ofresé esaki na e kongregashon di obispunan den Vatikano i ta advisá e Papa. E tres nòmbernan usualmente ta keda nominá den konsultashon ku e obispu saliente (eksepto ku e obispu saliente a fayesé òf ta vakante pa motibu di malesa di e obispu).
Tur obispu (eksepto pa Papa, obispu di Roma) ta rekerí segun Derecho Kanóniko (lei di Iglesia) pa ofresé nan resignashon den kasonan di malesa òf otro motibunan grave ku ta pone ku nan no por kumpli ku nan tarea òf nan mester hasi esaki ora nan yega e edat di 75.
Tur obispu ta obligá pa entregá un rapòrt kada sinku aña na Papa, elaborando riba nan obispado i kualke problema ku por tin den nan obispado òf difikultatnan ku e fielnan di Dios por tin. Kasi na mesun tempu ku e rapòrt mester keda entregá, tur e obispunan ku ta forma parti di e region (Antillean Episcopal Conference, AEC) mester hasi nan bishita ad limina Apostolorum, kaminda e obispunan mester bai Roma pa resa na e tumba di San Pedro i pa topa ku Papa individualmente pa asina pa pone na altura na e estado di Iglesia rònt mundu.
Mayoria pais òf region a establesé un konferensha episkopal òf manera otronan ta yam’é un konferensha di obispunan. Esaki ta forumnan kaminda e obispunan di e region por bini huntu pa diskutí diferente tópikonan òf kosnan komun ku nan tin ku diskutí ariba. Un kos nos mester kòrda ku no ta e konferensha episkopal tin ku ehersé siñansa i responsabilidatnan pastoral, pero esaki ta trabou di kada obispu individual di kada obispado.
Pasobra kada obispu mester tin un obispado bou di nan guia, tur e obispunan ku no ta na enkargo na un Diósesis real ta risibí unu di nan mes ounke esaki ta: “Sede Titular Episkopal”, esei ke men un obispado kaminda nan ta na kabes di dje. Esakinan den hopi kaso ta obispadonan ku un tempu a eksistí den mediteráneo, pero ku awor no ta eksistí mas.
Banda di un obispu ouksiliar pa asistí un obispu ordinario òf un arsobispu na enkargo di un obispado, bo por tin tambe un “obispu ko-adjuntor”. Un obispu ko-adjuntor ta nombra pa Papa pa asistí un obispu òf arsobispu na enkargo di un obispado, sinembargo tin diferenshanan importante:
Obispunan ko-adjuntor no ta risibí un obispado titular, pasobra nan ta (huntu ku e obispu eksistente) ‘ko-obispu’ di e obispado in kuestion;
Un obispu ko-adjuntor outomátikamente ta tuma over e posishon komo obispu di e obispado na momentu ku e obispu aktual muri òf na momentu ku su edat pa retirá keda aseptá pa Papa (penshun). Mi mester bisa ku obispunan ouksiliar por ta un opshon primordial pa haña un chèns pa keda nombrá komo e obispu titular, pero un obispu ko-adjuntor outomátikamente ta risibí e posishon na momentu ku e obispu titular yega su edat pa retirá, òf a fayesé.
Obispunan ko-adjuntor ta apuntá raramente òf pa motibunan serio ku ta enserá ku e obispu titular ta seriamente malu ku e no por kumpli ku su tareanan òf den kasonan ku e Santa Sede (Vatikano) ripará ku e fielnan por sufri pa motibu ku e obispu ta inkompetente.