VIENNA, Austria, - Partinan di e relatonan sekretu di e kaso di Natascha Kampusch ku a lèk a konmové repúblika oustriako.
E akta Nr. 222 UR 59/03-K tin 200.000 página i su kontenido ta eksplosivo i dramátiko.
E akta, tambe konosí bou di inisial “N.K.”, tin detayenan nobo di sekuestro di Natasha Kampusch i resultadonan di e investigashonnan despues ku e dama hóben a logra hui fo’i su koutiverio na ougùstùs 2006.
E akta “N.K.” tin relatonan riba interogatorionan, deklarashonnan di e hóben, detayenan riba e bida seksual perverso di Wolfgang Priklopil, su sekuestradó, i eksistensia di pòtrètnan i videonan ku ta demostrá ku e hóben a keda usá komo katibu seksual pa e hòmber kende a sekuestr’é na 1998, tempu ku e mucha muhé ta’tin 10 aña.
Te ku siman pasá djabièrnè, a mantené kontenido di e akta “N.K.” den sekretu, pero mannan misterioso i interesá a lèk un par di página di e akta na e korant grátis “Heute”, ku a publiká sinku página di relatonan nobo i detayenan hororoso di e sekuestro.
Kontenido di e páginanan no a keda desmentí pa Fiskalia oustriako, pero a provoká un skandal ku por tin konsekuensianan polítiko.
Segun e korant, e pòtrètnan i videonan enkontrá pa polisnan den un archivo elektróniko di Prikopril, nunka ekspertonan a analisá nan, kendenan a risibí, segun korant Heute, òrdunan djariba pa no hasié, i evitá ku esaki bira un skandal polítiko.
Pòtrètnan i videonan
Eksistensia di pòtrètnan i videonan a keda revelá pa promé bia pa revista “Stern”, dos luna despues ku e hóben a logra hui fo’i su koutiverio.
E revista a sigurá e tempu ei ku Priklopil ta’tin kontaktonan ku mundu “sadomasoquista” di Vienna i a kombèrtí Natascha den opheto seksual pa gana sèn.
Probablemente Priklopil a filma i saka pòtrèt di su víktima den esenanan brutal pa gana sèn, e revista a señalá.
E hóben tabata di bui, humiá i gòlpiá.
Vários persona tambe tabata presente.
Deskubrimentu di e pruebanan ta e promé konfirmashon ofisial di e denunsianan realisá pa “Stern” na òktober 2006, pero e bia aki korant “Heute” a revelá ku polisnan a revelá identidat di terser personanan.
A ninga e posibilidat di habri investigashonnan kriminal kontra otro personanan, pasobra algun polítiko no ke tin un skandal promé ku e elekshonnan general na Austria.
Pero algun agente a desafiá òrdunan di nan superiornan i a realisá investigashonnan den mundu “sadomasoquista” di Vienna, kaminda a deskubrí vários persona ku ta’tin kontakto ku e sekuestradó.
Por ehèmpel, Nicole S. di 27 aña a bisa: “Priklopil tabata perverso i ta’tin inklinashon pa muchanan muhé katibu den unifòrm di skol”.
Parti di e material ku a keda di lèk na e korant grátis tambe a añadí detayenan nobo riba koutiverio di Natascha i a bisa ku e hóben ta’tin un embaraso, pero no a duna detayenan si el a bira mama òf si el a kometé aborto.
Den e promé kòmbersashon ku Natascha ta’tin ku un agente di polis, inmediatamente despues ku el a hui, e hóben a konfesá ku e ta’tin relashon seksual boluntario ku su sekuestradó i riba e pregunta si Priklopil tin kómplisenan, e hóben a kontestá: “Mi no sa nan nòmber”.
Abogado di e hóben, Gerald Ganzger, a señalá ku lo demandá korant “Heute” i tur publikashon ku a publiká e aktanan, miéntras ku Fiskalia di Vienna a habri investigashon pa “vulnerashon di sekretunan ofisial”, un forma elegante pa atmití ku e dokumentonan filtrá di “akta N.K.” ta outéntiko.

Foto: Natascha Kampusch 2804

Natascha Kampusch riba pòtrèt di archivo 7 di ougùstùs 2007 durante Konferensia di Prensa na Vienna.