Mishon komersial pa Brazil masha eksitoso

WILLEMSTAD - Curaçao International Financial Services Association (CIFA), komo parti di su Plan Stratégiko titulá “Curaçao, the gateway to and from Latin America” i den koperashon estrecho ku Kámara di Komèrsio di Kòrsou, a partisipá na e mishon ekonómiko pa Brazil ku e Ministerio ulandes di Asuntunan Ekonómiko a organisá di dia 13 pa dia 19 di aprel último. E mishon aki tabatin na kabes e sekretario di estado ulandes pa Asuntunan Ekonómiko, señor Frank Heemskerk i alkalde Ivo Opstelten di Rotterdam.
E delegashon di Kòrsou tabata bou di liderato di presidente di Kámara di Komèrsio, señor Ruud Thuis. E tabata konsistí aparte di e presidente di CIFA, señor Herman Behr, di un desena di kompanianan prominente riba tereno di servisio finansiero internashonal.
Meta di e delegashon di Kòrsou tabata pa pone sektor komersial na Sao Paolo i Rio de Janeiro na altura di e hopi oportunidatnan ku Kòrsou ta brinda e merkado aki riba tereno di servisio finansiero internashonal. Den e kuadro aki a organisá na ámbos siudat seminario kaminda a splika Kòrsou su produktonan finansiero mas leu. Mas en partikular E-zone i e ‘Stichting Particulier Fonds’ (SPF) a krea hopi interes i for di e diferente kontaktonan ku a resultá for di e seminarionan sin lugá na duda lo sali enkargonan di trabou.
E delegashon a partisipá ademas na diferente evento ku e delegashon ulandes a organisá pa krea nètwèrk di kontakto. E gruponan di meta pa e delegashon ulandes tabata kompanianan den e sektornan di haf, transporte marítimo doméstiko, konstrukshon di bapor, energia biológiko, transporte i logístika. Den e kuadro aki e delegashon a bishitá tambe e Intermodal South America 2008 na Sao Paolo, e bolsa komersial mas grandi i mas importante di Latino Amérika riba tereno di komèrsio internashonal, transporte i logístika, loke a ofresé un bon oportunidat pa empresanan traha riba nan nètwèrk di kontakto.
E delegashon di Kòrsou ta wak bèk riba un mishon masha eksitoso. A resultá ku na Brazil tin hopi oportunidat i chèns. Loke si a bira kla ku Kòrsou mester traha na algun reto pa por hasi uzo optimal di e oportunidatnan aki. Por ehèmpel, mester duna prioridat pa kita Antia Ulandes for di e lista pretu di Brazil i den e mesun rosea mester kuminsá negosiashonnan pa yega na un tratado ku Brazil pa evitá kobramentu di belasting dòbel. Loke tambe ta drecha e posishon di Kòrsou komo partner komersial ta, si Brazil i Ulanda por yega na un akuerdo komersial ku ta aplikabel na Kòrsou tambe.
E partisipantenan na e mishon komersial ta konsiderando pa riba término kòrtiku duna un follow-up na e bishita aki, eventualmente den koperashon ku representantenan di Gobièrnu di Kòrsou.