ORANJESTAD- Aruba Scholarship Foundation lo tin beca disponibel pa aña scolar 2008 -2009. Tur studiante cu a gradua of cu ta graduando di VWO, HAVO, MAVO, EPI, etc., y ta pensa di sigui studia na un instituto di educacion superior, pero no na Hulanda, por pasa mas pronto posibel na Biblioteca Nacional na Madurostraat pa busca formularionan pa haci aplicacion pa un beca.
Por pidi formulario via email na clydeharms@setarnet.aw pero aplicacionnan NO por wordo someti pa email ni pa fax.
Pa di dos aña studiantenan cu kier sigui studia na Universidad di Aruba tambe por bin na consideracion. Studiantenan cu actualmente ta recibiendo beca di e ASF tambe mester aplica di nobo e aña aki!
Tur formulario mester wordo entrega na Sr. Hans Schnog, Toyota, Camacuri of na Sr. Clyde Harms, Jupiterstraat 6, Oranjestad.
En general, e aplicacionnan ta word considera a base di dos criteria:
1. E studiante mester comproba cu e mester di ayudo financiero.
2. E mester a demostra seriedad y capacidad den su estudio.
En cuanto necesidad financiero, cada candidato lo wordu considera riba su mes merito. Varios factor lo wordu tuma den cuenta. Por ehempel, cuanto e estudio ta bay costa; kiko ta e entrada realmente disponibel di e famia; cuanto jiu tin den famia; ki otro compromiso financiero e famia tin; disponibilidad di fondonan di otro fuente entre otro, prestamo di gobierno y otro factornan cu por ta gastonan extraordinario pa e famia.
E Foundation tambe ta tuma en cuenta kiko e candidato mes a haci pa yuda su situacion financiero.
Un aplicante mester ta acepta na e instituto caminda e kier bay studia, y e instituto mester tin e reconocimento necesario den e ramo cu e aplicante ta bay concentra. Si e studiante tin algun duda di e instituto cu ela scoge e por consulta cu Departamento di Enseñansa, Frankrijkstraat.
Tur studiante cu haya beca tin di compromete nan mes pa bin traha na Aruba pa mes tanto aña cu ela studia cu beca di A.S. F.
Den casonan cu tur otro cos ta igual, e studiante cu tin e puntenlijst mas halto lo haya e beca. Pero otro factornan tambe ta bin den consideracion: Ambiente socio-economico di e studiante cu por a afecta su habilidad pa haya puntonan mas halto; participacion den actividadnan caritativo, civico, cultural of deportivo.
E becanan aki no tin nada di haber cu e oferta especial pa Latin America/Caribbean (LAC) program na University of Central Florida (UCF), y esnan cu ta den e programa ey por aplica pa bin na consideracion tambe pa un ayudo financiero di Aruba Scholarship Foundation.
Aruba Scholarship ta un institucion completamente independiente. E ta wordu sostene door di contribucionnan di miembronan di nos comunidad: casnan comercial, profesionalnan y otro personanan cu ta comparti e vision di un Aruba miho prepara pa futuro. E directiva ta traha completamente pro deo.
Al momento e directiva ta consisti di Faride Tjong Ajon, Enrique “Tito” de Cuba, Etley Lasten, Jan van Nes, Hans Schnog, Erwin Croes, Eric d’Arnault y Clyde Harms.
Esnan cu ta comparti e vision aki y ta interesa den haci un donacion na Aruba Scholarship Foundation por hacie na Aruba Bank Account Aruba Scholarship Foundation # 127803