ORANJESTAD- E lectura cu Fundacion Digna Lacle Herrera, e organisacion pa formacion politici di partido AVP, a tene tocante di e e efectonan di BBO, inflacion y solucionnan pa alivia peso di medidanan cu gobierno a introduci desde 2001, tabata un exito atrobe. Drs. Arjen Albertsz, experto economico y conocedo di economia y finansa publico di Aruba, a duna un splicacion di e introduccion di BBO y e efectonan negativo cu e tabata tin.
Di impuesto directo pa indirecto
E escogencia pa cambia nos sistema di impuesto di uno directo pa uno indirecto riba su mes ta algo bon. E ta crea un base mas grandi pa haya impuesto y e ta mas husto. Cobramento di impuesto directo manera impuesto riba salario (loonbelasting) y riba ganashi (winstbelasting) ta desincurasha esun cu ta traha pa gana su entrada. Un sistema di impuesto indirecto, por ehempel riba consumo y benta, ta percura pa tur hende paga belasting segun loke e usa, cumpra of bende. Di e forma aki tambe esnan cu awor aki no ta paga impuesto di entrada of ganashi, no por scapa, pasobra nan tambe ta usa of cumpra cos pa come, traha, construi, etc. Un otro efecto cu tin cu un sistema di impuesto riba consumo y benta, ta cu contrario na impuesto rina importacion (invoerrechten) tambe ta cobra impuesto riba servicionan. Invoerrechten ta impuesto riba producto so.
BBO ta e pio sistema cu tin
Di e splicacion duna door di sr. Albertsz a resulta bon cla cu di e sistemanan cu tin rond di mundo pa cobra impuesto riba consumo y servicio, gobierno di Aruba a scohe e sun mas malo. Esta e BBO cu ta impone un impuesto riba cada momento cu un producto wordo importa of bendi. Esaki ta causa un efecto acumulativo y pa colmo henter e acumulacion di impuesto aki ta wordo pasa pa e consumido cu ta e ultimo den e rij di cumprador. Un otro efecto ta cu ora a introduci e BBO, gobierno no a elimina e impuesto riba importacion (invoerechten). Door di e combinacion di BBO y impuesto riba importacion di productonan (y no riba servicionan), Bo a haya cu productonan ta someti na dobel impuesto: invoerrechten y BBO. Esaki ta inhusto compara cu servicionan. Tambe apesar di cu gobierno a haci como sifuera e ta duna bek na pueblo e placa di impuesto cu e lo cobra cu BBO dor di baha por ehempel e tarifa di impuesto riba salario (loonbelasting / inkomstenbelasting) y riba ganashi (winstbelasting), den realidad gobierno a cobra y haya mas entraga cu ela duna pueblo bek.
Otro sistema di impuesto riba consumo y benta
Sr. Albertsz a trata e otro sistemanan y cu ehempelnan a mustra e diferencianan importante den costo pa e consumidor y e efectonan inhusto cu tin den e sistema di BBO compara cu otro sistemanan pa cobra impuesto riba consumo y benta. E sistema mas usa ta e VAT (value added tax) of BTW (belasting op toegevoegde waarde). E sistema aki no ta acumulativo y ta un impuesto riba loke un compania ta añadi na un producto. Ademas e no tin e fecto negativo y inhusto pasobra e ta conta pa producto y servicionan y e no ta desincurasha inversionnan.
Discusion en busca di solucion
Durante di e rueda di pregunta y e discucionnan cu tabata tin durante y despues di e charla, por a nota e buscamento intensivo di solucion pa alivia e peso grandi cu e BBO y otro medidanan cu gabinete Oduber a impone desde aña 2001. Interesante tabata tambe pa nota e cantidad grandi di doño di negoshi, empleadonan publico y famianan cu tabata presente. Den e discucion a señala e intentonan haci door di fraccion di AVP den Staten pa evita e introduccion di e BBO, e proposicionnan haci pa medio di e presupuesto alternativo pa compensa e efectonan di e BBO pa pueblo y e advertencia haci prome cu e introduccion di e BBO cu e fecto lo tabata mas grandi cu djies e tres, seis of nuebe porciente riba productonan. Un aña despues cu a introduci BBO por a wak cu e advertencia di AVP lamentabelmente a bira berdad. Costo di bida na Aruba a subi mas cu 10 porciento den un aña y productonan individual a subi mas cu esey. Ya partido AVP a bisa cu lo elimina e BBO gradualmente ora e drenta gobierno y lo sigui busca formanan husto pa cambia e sistema di impuesto pa uno mas husto pa famia y companianan.