WILLEMSTAD – “Nos mester ban bèk na base”, asina pader Amado Römer a duna di konosé na okashon di Dia di Obrero.
Globalisashon ta pone ku tur kos regional i nashonal ta bira someté na loke ta globalisashon. El a pone ku ekonomia (petroli) ta bira problema pa henter mundu, pasobra nos tur ta mara na dje. Obreronan ku semper tabata afiliá ta pèrdè forsa. Henter e trènt ta ku papia di sèn, pero esaki no ta lo mas importante, asina pader Römer a enfatisá. Aki pa motibu di sèn nos a pèrdè e tiki di ekonomia ku nos tabatin ora Shell a bini i agrikultura a kai. E nifikashon di Dia di Obrero ta bisa ku nos ban bèk na loke trabou ta realmente, esta ku trabou ta mesun importante ku sèn. Awendia henter mundu trabou ta pèrdiendo forsa, pasobra hende no ta organisá nan mes manera ántes. Si trahadónan huntu no uni, no por forma un moketa pa e lucha. Lidernan tambe ta pasando den mesun kos poniendo atenshon na kosnan di ménos importansia. Influensia di credit union tambe a bai pèrdí. Sindikatonan no ta keda skuchá pa gobièrnu. Tin kos hopi mas importante ku ta famia, e persona. Ta inkreibel ku trahadónan di DCA ainda no por keda kla despues di 8 aña no a haña nan plaka, asina pader Römer a remarká riba un notisia di siman pasá. Ken a sali bai defendé e hendenan aki. Nan derechi ku nan tin esei ta importante. P’esei mester bai base bèk, ta bisa ku e hende ta sentral, pero esaki ta laga di deseá.
Ban bringa inhustisia ku ta mas importante i di mes pobresa ta baha, situashon ta drecha i hasta polítika ta kambia su rumbo. Ban bèk na base. Mas aleu pader Römer a remarká ku tin lugá ku ainda no ta aseptá sindikato, ban papiá tokante e kosnan aki, pasobra niun hende no ta papia riba esaki, nos no ta komprondé di loke ser tratá. Si nos traha riba e hende, e ta bira mas outónomo i niun hende no por hasi kuné manera nan kier.
Sindikatonan mester lanta i mustra te aki i nos mas leu, no ta aseptá mas. Nos mes hendenan por, edukashon di obrero no téknika, pero sosialmente pa hende bira hende i ta bira obrero i speransa pa futuro pa henter pueblo.