SANTA CRUZ, Bolivia, - E region di Santa Cruz, ku ta konsentrá 30% di produkshon boliviano, mañan lo bai urna pa aprobá su statuto di Gobièrnu outónomo, un forma di konstitushon lokal, ku ta konfrontando Presidente di Bolivia Evo Morales, kende ta konsiderá e konsulta ilegal.
Bou di inisiativa di su lidernan polítiko i empresarial, opositornan fuerte di Presidente Morales, mas o ménos 935.000 cruceño mañan lo disidí si nan ta aprobá un statuto di outonomia di tendensia liberal.
E statuto aki ta duna outoridatnan departamental fakultatnan den materianan ekonómiko i polítiko, inkluyendo formashon di un kuerpo di polis propio, i ta laga pa e Estado solamente funshonnan di defensa i relashonnan eksterior.
Otro sinku region di e pais goberná pa opositornan i kendenan ta konfrontando proyekto di refundashon konstitushonal ku Morales ta impulsá, tambe ta di akuerdo ku e afan outonomista na Bolivia.
Enkuestanan e siman aki a revelá ku aprobashon di e statutonan ta entre 70 i 75% pa un votashon ku Gobièrnu tabata ke impidí i ku awor ta trata minimisá dor di kalifik’é solamente komo un konsulta.
Sekretario general di “Organización di Estados Americanos” (OEA), José Miguel Insulza, ayera a atvertí ku e konflikto entre Gobièrnu i algun departamento lo por kondusí na divishon di e pais.
“Niun hende ta tribi di bisa esaki, pero asina ta!”, Insulza a afirmá na Konseho Permanente di OEA, reuní pa analisá e kaso.
E régimen outónomo ku lo bai keda someté den referèndem mañan, na e próspero Santa Cruz, lo benefisiá e élitenan, segun Gobièrnu, miéntras ku lidernan regional ta bisa ku redukshon di e influensia di poder sentral di La Paz lo sirbi pa eliminá pobresa.
E konsulta riba e statuto outonómiko a bira e punta di lansa di e konfrontashon fuerte polítiko di Gobièrnu iskierdista ku derecha empresarial, ku ademas a lanta e rivalidat bieu entre La Paz i Santa Cruz, ku tinte étniko.
E lidernan di Santa Cruz, kendenan generalmente ta empresarionan agroindustrial blanku, ta hustifiká e nesesidat di krea un Gobièrnu departamental outónomo bou di e argumento ku redusiendo poder di Gobièrnu Sentral e rekursonan lo bai ta mihó atministrá na nivel lokal, segun Diputado opositor Carlos Klinsky.
E statuto outonómiko di Santa Cruz lo plantea rekorte di 43 kompetensia di Gobièrnu Sentral.
Miéntras tantu, Gobièrnu ta sospechá ku e statuto tin un transfondo útil pa e élitenan.
Segun eks Presidente di Bolivia, Carlos Mesa, e tema di distribushon di teranan, ta tras di e outonomianan regional.
E outonomianan regional a keda aktivá despues ku Morales a impulsá Konstitushon nobo, ku ta preveé limitashonnan di tenensia di teranan.
Un referèndem nashonal mester disidí riba un fecha no definí ekstenshon entre 5.000 10.000 hèktar.
OEA ta respaldá Morales
OEA awe mardugá a disidí respaldá Gobièrnu di Morales despues ku e pais andino aki a pidi un pronunsiamentu riba e referèndem outonómiko di Santa Cruz.
Sin embargo, e Konseho Permanente di OEA no a abordá e tema di e konsulta popular programá pa mañan, ku a generá frikshonnan grave entre poder sentral i lokal na e pais andino aki.
E organismo a ekspresá den un resolushon firmá pa 34 pais miembro “su solidaridat i respaldo n’e pueblo di Bolivia, Gobièrnu konstitushonal dirigí pa Presidente Evo Morales Ayma, e institushonalidat demokrátiko i outoridatnan eligí pa e pueblo boliviano”.
Tambe a pidi rèspèt na su òrdu konstitushonal i “integridat teritorial di Bolivia” i a rechasá kualke intento di kiebro di ámbos.
Den e resolushon di OEA tambe a urgi “tur aktor polítiko sosial i regional di e pais pa dialogá mas lihé posibel.
Hustamente e kansier di Bolivia, David Choquehuanca, a afirmá oranan promé den seno di e organismo hemisfériko, ku tur esfuerso di Gobièrnu pa habri portanan di diálogo a frakasá.
Sekretario di asuntunan polítiko di OEA, eks kansier argentino Dante Caputo, na e pais andino aki den último simannan a reuni ku tur aktor polítiko involukrá i el a afirmá ku a hasi “un gran esfuerso” pa evitá violensia.
E resolushon di OEA tambe a pidi e bolivianonan resolvé nan diferensianan mediante via pasífiko “ku pleno rèspèt pa e proseso demokrátiko”.

Foto: Bolivia siguidonan di Morales 0305

Siguidónan di Presidente Evo Morales durante nan kampaña na La Paz.

Foto: Simpatisante di Evo Morales 0305

Un simpatisante di Presidente Evo Morales ta grita lemanan anti-outonomia durante un demostrashon na Santa Cruz de la Sierra.

Foto: Karchinan di vota 0305

Empleadonan di Korte Elektoral di Santa Cruz ta konta karchinan di vota pa entregá nan na urnanan na Santa Cruz de la Sierra.

Foto: Simpatisantenan pro outonomia 0305

Simpatisantenan pro-outonomia ta grita lemanan durante demostrashon na Santa Cruz.