BEIJING - Tur e stadion nan mahestuoso miles di mion dollar invertí pa transformá Beijing den un suidat moderno a keda na di dos lugá pa motibu di e protestanan na fabor di Tibet. Un relevo di antorcha kaótiko rònt mundu i e indignashon di e chinesnan pa ku oksidente ya ku nan magno evento a wòrdu trapá.
Faltando 100 dia pa inougurashon, mantené polítiko leu for di Weganan Olímpiko ta parse un kousa pèrdí.
Un aña pasá, e eks presidente di KOI, Juan Antonio Samaranch a bisa, ku e weganan di Beijing lo ta esun di mas mihó den historia. Su susesor, Jacques Rogge, a lamentá ku e weganan ta den un krísis.
Esaki no ta promé biaha ku polítika ta interferí ku Weganan Olímpiko, pero e aña aki a resultá esnan ku mas konflikto for di e bòikòtnan di dékada 80.
"Outoridatnan chines tin nan mannan yen ku un problema serio di relashonnan públiko," asina un eksperto a bisa.
E dianan aki tin un ambiente negativo na Beijing. Un ola di disturbio luna pasá na Tibet a provoká manifestashonnan anti China na London, Paris, San Fransisco i otro suidatnan unda e antorcha olímpiko a hasi su rekorido.
E trayekto tabata mas bien un farse pa e kantidat di kambio na último ora di e ruta ku invitashon spesial pa evitá protestanan.
E bèrdat ta, ku polítika a hasi su mes presente for di momentu ku China a risibí sede shete aña pasá.
Ainda tin tempu pa e Weganan lanta kabes. Pero Beijing mester di un poko suerte. Nan lo por logra esaki ku algun evento di ménos perfil manera a tuma lugá for di djarason.
E organisadónan ta selebrá e konteo regresivo di 100 dia. E promé evento lo ta un mini máratòn rondó di e stadion nashonal i e instalashon nan unda e kompetensia di natashon lo tuma lugá.
Tambe lo kompletá e konkurso di kuater aña pa skohe e tema musikal di e weganan. E buèlta di e vlam na kontinente chines na kuminsamentu di mei lo por nifiká ku e pió ta tras di lomba i ku lo tin ménos protesta ounke ningun hende lo no ta testigu di esei.
Kualke bòikòt, ounke parsialmente di e seremonia di apertura komo kontesta di e represhon na Tibet, lo generá mas enemistat anti oksidente.
E oferta di parti di China pa inisiá kòmbersashonnan ku representantenan di Dalai Lama por redusí e posibilidat di mas protesta.
E plan di sera industrianan i suspendé obranan di konstrukshon pa redusí e aire sushi tabata e trastorno mas ferfelu promé ku e disturbionan a kuminsá na Tibet.
Na kualke momentu durante e weganan por produsí situashonnan poko agradabel pa e chinesnan. Kualke akto di repudio kontra polítika di China na Tibet i Darfur por risibí amplio kobertura di parti di e 30 mil periodistanan presentá i asina pone na prueba e toleransha di e gobièrnu.
Spònsernan grandi manera Coca-Cola i General Electric, por haña nan den purá.