MANCHESTER - E kampion di Europa e aña aki lo ta un ekipo ingles sea ta Manchester United òf Chelsea. E diabelnan kòrá a avansá pa e final djamars ku un viktoria di 1-0 riba Barcelona di Frank Rijkaard. E úniko gol di wega a wòrdu anotá pa Paul Scholes. E promé wega entre e dos ekiponan aki a finalisá den un empate sin gol.
Den e wega di ayera entre Liverpool i Chelsea, e ganadó a resultá Chelsea ku skor di 3-2 den tempu èkstra.
Manchester i Chelsea lo disputá e título dia 21 di mei na Mosku. Esaki ta e di tres biaha den nan historia ku Manchester United a klasifiká pa e final di Liga di Kampion i promé biaha for di 1999 ora ku nan a bira kampion ku un viktoria di 2-1 riba Bayern Munich. Na 1968 tambe Manchester a gana e kopa kontra di Benfika.
Pa Chelsea esaki ta pa promé biaha ku nan ta hunga den e final di Liga di Kampion den nan historia.
"Loke ta importante ta ku nos ta den final i no ta importá kon nos a hunga," asina e tékniko di Manchester United, Ferguson a bisa. "Nos tabatin mester di un gran aktuashon i nos a logra. Nos por a anotá tres pa kuater gol. Scholes, a anotá na di 14 minüt di wega.
Pa Barcelona esaki por nifiká un fin di un era, ya ku e kopa aki tabata e último trofeo ku e ekipo tabata aspirá pe ainda pa e temporada aki.
Un ekipo ku figuranan manera Lionel Messi, Samuel Eto'o i Deco ta tèrminá e temporada aki ku man bashí i hopi ta kere ku e tékniko ulandes, Frank Rijkaard lo no regresá pa próksimo temporada. E mes a deskartá e posibilidat di renunsiá.
"Liga di Kampion a kaba pa nos i awor nos mester sigui ku hopi karakter i orguyo," asina Rijkaard a bisa. "Nos mester sigui i e ekipo mester di ayudo i mi no tin ningun idea di bisa awor aki ku mi no ta sigui mas. Eseinan ta konklushonnan ku mester wòrdu saká na final di temporada. Awor aki ta fásil pa ataká tur hende, pero mi ta kere manera e ekipo aki a lucha, e meresé rèspèt i tambe ayudo. Nos mester lanta nos kabes i hasi tur lokual ta posibel pa kaba e temporada aki den mihó forma," asina Rijkaard a añadí.
Djarason tabata Chelsea ku a avansá pa su promé final di Liga di Kampion, danki na par di gol di Didier Drogba i Frank Lampard den tempu èkstra. E tempu reglamentario a finalisá empatá 1-1. Lampard a kibra e empate na di 89 minüt ku un pinalti despues di un falta riba Michael Ballack. Na di 105 minüt, Drogba a anotá su di seis gol di e torneo pa pone Chelsea den e final.
Ryan Babel a deskontá pa Liverpool na 117 minüt ku un tiru for di 25 meter.
Esaki ta promé biaha ku lo tin un final netamente ingles i lo tin komo protagonista dos ekipo ku tambe ta den bataya pa e título ingles.