WILLEMSTAD - Presidente di Sentral di Sindikatonan di Kòrsou SSK, alabes presidente di Plataforma Sindikal Alcides Cova a boga pa parlamentu di Antia pasa vários lei laboral ku tin añanan largu drumi den lachi i ku ta na benefisio di e klase trahadó.
“Nos ke hasi un yamamentu urgente riba parlamentu di Antia pa pasa e leinan aki di manera ku trahadónan no mester bira víktima kada biaha di nobo di práktikanan di mala fe di doñonan di trabou”, asina Cova a bisa den su diskurso na okashon di selebrashon di Dia di Obrero dia 1 di mei último.
Kontrali na añanan anterior, e biaha aki e santu sakrifisio di misa ku semper ta tuma lugá promé ku e marcha di trahadó, no a tuma lugá parti mainta, pero 5’or di atardi i no na Sta. Famia, pero Basílika Sta. Ana.
Cova, den un splikashon pa esaki a bisa, ku eksperensia a mustra ku e trahadó den hopi kaso no ta masha inkliná pa sali kas mainta tempran pa asistí na un konmemorashon asin’aki.
Mester bisa, ku e marcha ku tradishonalmente a bin ta sali for di misa di Sta. Famia pa bai direkshon di e busto di Felix Chacuto, último añanan aki en bèrdat tabata basta marginá: no tabatin masha trahadó ku a mustra nan kara riba e mainta ei.
Bo ta tende tur sorto di argumento, manera ta un dia liber pa sosegá, ta un dia pa pasa ku famia i asta tin ta konsiderá ku ta un dia pa festehá mas tantu posibel.
Ta pa e motibu ei nos a kambia e orario, segun Cova a splika.
Por sierto ku sindikatonan a tene un minüt di silensio pa e hecho ku e polítiko di taya i trayekto largu Juancho Evertsz a bai sosegá un dia promé. A pone manera kustumber krans na busto di Felix Chacuto.
Den su diskurso, Alcides Cova a rekòrdá kon e lucha pa un mihó bienestar di e trahadó a kuminsá na Chicago na 1886.
Un grupo chikí di trahadó a disidí di lanta i protestá kontra e oranan largu di trabou i a kuminsá eksigí un dia di trabou di 8 ora.
E lucha a bira históriko, ya ku nan mester a paga pa esaki ku nan bida.
Awe, e trahadó por gosa di kondishonnan di trabou muchu mas faborabel ku tabata e kaso mas di 120 aña pasá.
Pero ainda tin vários sirkunstansia, ku ta un menasa pa e klase trahadó.
Un dje problemanan di mas preokupante di último tempu ta e fenómeno “koppelbaas” ku ta manifestando atrobe riba tereno di e refineria aki na Kòrsou. Cova ta kere, ku mester yega un fin na e asuntu aki i el a hasi un yamamentu riba gobièrnu pa tuma e pasonan nesesario pa esei por tuma lugá. Pero tin mas motibu di preokupashon, el a bisa.
Doñonan di trabou ku ta sera negoshi i habri esaki bou di otro nòmber, djis pa saka nan kurpa for di sindikato, negoshinan ku no ta kumpli ku pago manera mester ta i empresanan ku ta sera lagando trahadó kompletamente desampará sin niun klase di benefisio.
Alcides Cova a boga pa loke el a yama leinan laboral sosial ku sindikalismo tin hopi aña ta papiando di dje, pero ku ketu bai no ta na vigor.
Aki por menshoná por ehèmpel e lei “Wet Verbindend en Onvebindend Verklaren der Cao’s”, un lei ku ta stipulá ku loke ta konta pa un empresa den un sierto sektor, mester konta pa tur otro empresa similar den e mesun sektor.
“Kòrsou ta e úniko pais na mundu kaminda ta eksigí pa un sindikato tin 50 porshentu di trahadónan di un empresa su tras, pa e por haña representashon. E kos aki ta insólito i antikuá,” segun e dirigente sindikal. El a boga pa adaptá e lei di referèndem den empresa na nos tempu moderno.
“Un otro lei ta Lei pa Derechi Preferenshal di Trahadó. Muchu tantu biaha ta sosodé, ku un empresa ta dal porta sera, anto otronan, eksepto e trahadó ta bin na remarke pa haña pago. Trahadónan mester ta esnan promé ku ta haña loke ta toka nan”, segun Cova a trese dilanti.